काठमाडौं । नेकपा माओवादी केन्द्रले सरकारमा सहभागी आफ्ना मन्त्रीहरुलाई फिर्ता बोलाएको छ ।
विना विभागीय मन्त्री भएको ३ महिनापछि माओवादीले आफ्नो पार्टीबाट सरकारमा सहभागी मन्त्रीलाई फिर्ता बोलाएको हो । माओवादीका तर्फबाट मन्त्रीहरु फिर्ता भएको पत्र प्रधानमन्त्री शेरबहादुर देउवाकहाँ बुझाएका छन् ।
प्रधानमन्त्री देउवाका प्रेस संयोजक गोविन्द परियारका अनुसार माओवादीका तर्फबाट सरकारमा सहभागी भएका बिनाविभागीय मन्त्रीले शुक्रबार पत्र बुझाएका छन् ।
नेपाली कांग्रेसको नेतृत्वमा सत्ता साझेदार बनेर सरकारमा गएको मााओवादीले २०७४ असोज १७ गते एमालेसँग मिलेर अर्को गठबन्धन बनाएको थियो । सोही निर्णयअनुसार प्रदेशसभा र प्रतिनिधिसभा निर्वाचन लड्ने घोषणा गरेपछि प्रधानमन्त्री देउवाले जिम्मेवारी खोसेर बिनाविभागीय बनाएका थिए ।
आफ्ना मन्त्रीहरुलाई फिर्ता बोलाउने निर्णय गरेको माओवादीले पछि निर्वाचन नभएसम्म सरकारमै रहने निर्णय गरेपछि प्रधानमन्त्री देउवाले असोज ३१ गते ९ मन्त्री र ७ राज्यमन्त्रीको जिम्मेवारी खोसेर विनाविभागीय बनाएका थिए ।
पार्टीको निर्णयअनुसार सरकारबाट फिर्ता हुने अध्यक्ष पुष्पकमल दाहालको पत्रसहित विनाविभागीय मन्त्री गिरिराजमणि पोख्रेलले शुक्रबार प्रधानमन्त्री देउवालाई भेटेका थिए ।
उनले दाहालको पत्र पनि बुझाएका थिए । सरकारबाट फिर्ता हुनेबारे अध्यक्ष दाहालको पत्रमा ताजा जनादेशअनुसार सरकारबाट काम नभएकोमा असन्तुष्टि पनि जनाईएको छ ।
पोख्रेलले आफुले विनाविभागीय भएको अवधिको तलब सुविधा नलिने बताए । उनले सबैलाई सो अवधिको तलब सुविधा नलिने भन्ने बारेमा पनि छलफल भईरहेको जानकारी दिए ।
राप्रपा अध्यक्ष कमल थापासहित आठजना मन्त्रीलाई नयाँ जिम्मेवारी दिएर प्रधानमन्त्री देउवाले माओवादी मन्त्रीलाई विनाविभागीय बनाएका थिए । माओवादी केन्द्रले उपप्रधानमन्त्री कृष्णबहादुर महराको नेतृत्वमा जनार्दन शर्मा, टेकबहादुर बस्नेत, गिरीराजमणि पोखरेल, महेन्द्रबहादुर शाही, शिवकुमार मण्डल, आशा कोइराला, सन्तकुमार थारू र प्रभु साहलाई मन्त्री र राज्यमन्त्रीमा मोहमद जाकिर हुसैन, राजसिंह यादव, श्यामकुमार श्रेष्ठ, कर्णबहादुर विक, छमबहादुर गुरुङ, गोमा कुँवर र ओङदी शेर्पालाई सरकारमा पठाएको थियो ।