एजेन्सी । प्रत्येक क्रिकेट टोलीले आफ्नो टिममा अलराउण्डर प्रदर्शन गर्ने धेरै खेलाडी चाहेका हुन्छन् । जुन खेलाडीले बलिङ र ब्याटिङ दुवैमा उत्कृष्ट खेल्न सकुन् । तर, हरेक टोलीमा अलराउण्डर प्रदर्शन गर्ने खेलाडीहरु कमै हुन्छन् ।
विश्व क्रिकेटमा अलराउण्ड प्रदर्शन गर्ने खेलाडीले बलिङ र ब्याटिङ उत्कृष्ट गर्ने गरेको इतिहास छ । तर, पछिल्लो समय क्रिकेट जगतमा एक श्रीलंकन युवा खेलाडी देखिएका छन् । जसले सबैको ध्यान तानेको छ ।
उनी अन्य क्रिकेटरभन्दा केही फरक छन् । ती खेलाडी हुन, श्रीलंका यु – १९ क्रिकेट टोलीका कप्तान कामिन्डु मेन्डिस ।
न्युजिल्यान्डमा शनिबारबाट सुरु हुने आइसीसी यु–१९ विश्वकप क्रिकेटअघि मेन्डिस चर्चामा छन् । कारण, मेन्डिसको असामान्य बलिङ । क्रिकेटमा उनी बलिङ र ब्याटिङ मात्र गर्दैनन् । मेन्डिस यस्ता खेलाडी हुन्, जसले दुवै हातले उस्तै एक्सनमा बलिङ गर्न सक्छन् । जुन विश्व क्रिकेटमा कमै देखिन्छन् ।
त्यतिमात्र हैन, मध्यक्रममा ब्याटिङ गरेर टोलीलाई जितको बाटो देखाउन सक्षम छन् मेन्डिस । त्यसैले यु–१९ विश्वकपअघि मेन्डिसलाई फ्युचर स्टारको रुपमा हेरिएको छ । विश्वकप अघि अन्तर्राष्ट्रिय क्रिकेट परिषद् आइसीसीले मेन्डिसलाई भविष्यको स्टार उल्लेख अभूतपूर्व खेलाडी भनेको छ ।
न्युजिल्यान्ड विश्वकपमा श्रीलंकाको कप्तानी सम्हाल्ने मेन्डिस स्पिनर हुन् । उनी मैदानमा राइट आर्म अफब्रेक र स्लो लेफ्ट आर्म अर्थोडक्स स्टाइलमा बलिङ गर्न सक्छन् । आफ्नो टोलीको आवश्यकता अनुसार बलिङ गर्दै मेन्डिसले क्रिजमा रहेका ब्याट्सम्यानलाई काबुमा राख्न सक्छन् ।
क्रिकेट खेलको सुरुवातबाटै दुवै हातले बलिङ गरेको कारण नै मेन्डिस युवा अवस्थामै चर्चाका पात्र बने । जब क्रिजमा फरक दुई ९दायाँ–बायाँ ० हाते ब्याट्सम्यान हुन्छन् तब, मेन्डिस दुवै ब्याट्सम्यानलाई फरक फरक तरिकाले बलिङ गर्दै रन बनाउनबाट रोक्न सक्छन् ।
आफ्नो फरक बलिङबारे मेन्डिसले आइसीसी मिडियामा भनेका छन्, “जब म क्रिकेट सिक्न थालें, मैले प्रशिक्षकसँग अभ्यास गर्दा दुवै हातले बलिङ गर्ने गर्थें । त्यसैले अहिले म दुवै हातले बलिङ गर्न सक्छु । तर, यो खेल र ब्याट्सम्यानको अवस्थामा निर्भर हुन्छ ।”
मेन्डिसको बलिङ देखेर अम्पायरहरु पनि कहिलेकाहीँ चकित हुन्छन् । उनले धेरै पटक यस्तो घटनाको सामना गरेका छन् । मेन्डिस भन्छन्, “जब म अम्पायरलाई बलिङ परिवर्तनबारे भन्छु, कहिलेकाहीँ उनीहरुले ‘तिमी के गर्न लागिरहेको छौ’ जस्तो गरी मलाई हेर्ने गर्छन् ।”
गाले क्रिकेट क्लबका युवा खेलाडी मेन्डिस प्राकृतिक रुपमा लेफ्ट ह्यान्डेड ब्याट्सम्यान हुन् । उनले यु १९ एकदिवसीय क्रिकेटमा ४ अर्धशतक बनाइसकेका छन् । मेन्डिसले आफ्नो करियरमा पाकिस्तानबिरुद्ध सर्वा्धिक ६८ रन जोडेका छन् । न्युजिल्यान्ड विश्वकपमा पाकिस्तान श्रीलंका रहेकै समूहमा छ ।
सन् १९९८ मा जन्मिएका मेन्डिसले ए लिष्टको क्रिकेट सन् २०१५ मै खेलिसकेका छन् । मेन्डिस यु १९ क्रिकेटमा श्रीलंकाका सर्वाधिक क्याप खेल्ने खेलाडी समेत हुन् । मेन्डिसले दुई पटक यु – १९ विश्वकप खेलिसकेका छन् ।