काठमाडौं । विवेकशील साझा पार्टीका संयोजक उज्जवल थापाले चुनावमा पराजित भए पनि आफूहरु सधैं जनताको सेवामा लागिरहने बताएका छन् । भर्खरै सम्पन्न चुनावमा संगठनबिना नै नेपाली जनताले आफूहरुलाई छैटैं ठूलो दल बनाएको उनले बताए । 

उनले बाह्रखरीसँग भने, ''२ लाख १२ हजार जनाले हामीलाई छैटौं ठूलो दल बनाएका छन् । उहाँहरुको मन जित्न हामी भष्ट्राचारविरुद्ध जहिल्यै लागिरहन्छौं । हामी लुटतन्त्रको विरुद्ध, विधिको शासन, न्यायले जित्ने शासनको लागि जहिले लडिरहन्छौं ।'' 

विवेकशील साझा पार्टी चुनावपछि संगठन विस्तारमा लागेको जानकारी उनले दिए । ''चुनावपछि हामी देशभरका विवेकशील नागरिकहरुलाई एक ठाउँमा ल्याउने तयारीमा छौं । हाम्रो संगठन नहुँदा प्रतिनिधिसभा सदस्यको लागि एउटा पनि सिट जित्न सकेनौं, अब अर्को चुनावमा संगठनसहित भाग लिन्छौं,'' उनले भने ।

उनले मुलुकमा स्थिरता नरहेको जिकिर समेत गरे । ''देशमा स्थिर सरकारको नाममा अहिले पनि स्थीरता छैन । लोकतन्त्रको नाममा लुटतन्त्र भइरहेको छ । यस पटकको चुनावमा पनि आम नेपाली नागरिकलाई झुक्याइयो,'' उनले भने ।