एजेन्सी । साबिकको बिजेता पेरिस सेन्ट जर्मेन (पिएसजी) फ्रेन्च कप फुटबलको अन्तिम ३२ मा प्रवेश गरेको छ । आइतबार राति भएको खेलमा रेनसलाई ६ – १ ले पराजित गर्दै पिएसजी अन्तिम ३२ मा प्रवेश गरेको हो ।
रेनसको घरेलु मैदानमा भएको खेलमा पिएसजीलाई फराकिलो जित दिलाउन नेयमार, केलीयन एमबाप्पे र एन्जल डी मारियाले समान दुई दुई गोल गरे । रेनसका बेन्जामिनले एक गोल फर्काए । घरेलु टोलिबिरुद्ध एकतर्फी जित निकाल्ने क्रममा पिएसजीले पहिलो हाफमा ४ र दोस्रो हाफमा दुई गोल गरेका थिए ।
पहिलो हाफको नवौं मिनेटमा एमबाप्पेको गोलबाट पिएसजीले सुरुवाती अग्रता बनाएको थियो । १७ औं मिनेटमा नेयमारले पिएसजीको अग्रता दोब्बर बनाए । खेलको २३ औं मिनेटमा डी मारियाले पहिलो र ४३ औं मिनेटमा नेयमारले व्यक्तिगत दोस्रो गोल गरेपछि पिएसजी पहिलो हाफमा ४ – ० ले अघि रह्यो ।
दोस्रो हाफमा खेलमा फर्कने कोशिस गरेको रेनसले खेलको ६६ औं मिनेटमा एक गोल फर्कायो । रेनसका बेन्जामिनले गोल गर्दै खेल ४ – १ मा ल्याए । तर, ७४ औं मिनेटमा डी मारिया र ७५ औं मिनेटमा एमबाप्पेले एक एक गोल गरेपछि पिएसजीले ६ – १ को फराकिलो जित निकाल्यो ।