एजेन्सी । ब्राजिलियन क्लब ग्रेमियो क्लब विश्वकप फुटबलको फाइनलमा प्रवेश गरेको छ । मंगलबार राति भएको सेमिफाइनलमा मेक्सिकोको पचुकालाई अतिरिक्त समयमा १ – ० ले पराजित गर्दै ग्रेमियो उपाधि नजिक पुगेको हो ।
ग्रेमियोको जितमा एभर्टनले निर्णायक गोल गरेका थिए । खेलको निर्धा्रित ९० मिनेट गोलरहित बराबरीमा सकिएपछि खेल अतिरिक्त समयमा धकेलिएको थियो ।
अतिरिक्त समयको पाँचौ मिनेटमा एभर्टनले गोल गर्दै ग्रेमियोलाई महत्वपूर्ण जित दिलाए ।
एभर्टनले दोस्रो हाफमा मैदान छिरेर टोलीलाई महत्वपूर्ण गोल गरेका हुन् । उनी खेलको ७२ औं मिनेटमा माइकलको स्थानमा मैदान छिरेका थिए । त्यसअघि प्रतिस्पर्धात्मक बनेको खेलमा दुवै टोलीले गोलको अवसर पाएपनि गोल गर्न सकेनन् । खेलको ११० औं मिनेटमा भिक्टरले दोहोरो पहेलो कार्डसहित रातो कार्ड पाएपछि पचुका १० खेलाडीमा समेटिएको थियो । त्यसपछि दुवै टोलीले थप गोल गर्न सकेनन् र खेल ग्रेमियोले १ – ० ले आफ्नो बनायो ।
अब ग्रेमियोले उपाधिको लागि स्पेनिस क्लब रियल मड्रिड र युएईको अल जाजिराबीचको विजेतासँग खेल्ने छ । रियल र अल जाजिराबीचको दोस्रो सेमिफाइनल खेल बुधबार हुँदै छ । विजेताले ग्रेमियोसँग उपाधिको लागि खेल्ने छ ।