काठमाडौं । गत सेप्टेम्बरमा उत्तर कोरियाले गरेको परमाणु परीक्षणपछि त्यहाँ ६.३ रेक्टरको भूकम्प आएको थियो । यस झट्कापछि देखि नै उत्तर कोरियाको जमिन लगातार हल्लिरहेको बताइएको छ ।
जमिनभित्रका गतिविधिको अनुसन्धान गर्ने संस्था यूएस जियोलोजिकल सर्वेका अनुसार उत्तर कोरियाको जमिन भित्र त्यसबाहेक अन्य दुईपटक पनि ठूलो हलचल महसुस गरिएको थियो । तीन सेप्टेम्बरमा उत्तर कोरियाले गरेको अहिलेसम्मकै विशाल मिसाइल परीक्षणलाई हाइड्रोजन बम भएको दाबी गरेको थियो । यसैको परीणाम स्वरुप त्यस क्षेत्र वरिपरिका पहाडहरु अस्थिर भएको हुन सक्ने विशेषज्ञहरुले अनुमान गरेका छन् ।
यूएस जियोलोजिकल सर्वेका अनुसार त्यही समयपछि आइरहेको लगातारको पराकम्पनले सो जमिनलाई पुनः स्थिर बनाउने कोशिश गरिरहेको छ । अहिले त्यहाँ ३.९ रेक्टरका पराकम्पन दैनिक जस्तो महसुस हुने गरेको रेकर्डमा देखिएको छ । रोएटर्सको खबर अनुसार ठूल्ठूला परमाणु परीक्षण गर्दा जमिन आफ्नो स्थानबाभट थोरै यताउता खस्किन सक्छ र त्यसलाई आफ्नो पूर्वस्थानमा आउन केही समय लाग्छ । त्यसैकारण महिनौँसम्म उत्तर कोरियामा यस्ता पराकम्पन आइरहेको वैज्ञानिकहरुले बताएका छन् । यसै कारणले अहिले उत्तर कोरियाका सुरुङहरु भत्किएको हुन सक्ने अनुमान गरिएको छ । त्यहाँका चट्टानहरुमा बारम्बार नोक्सान पुगिरहेको हुँदा यसले नजिकको ज्वालामूखी पनि फुटाउन सक्ने खतरा रहेको वैज्ञानिकहरुले बताएका छन् ।
यसैबीच अहिले नेता किमको पैक्टु हिमालमा भ्रमण गरिरहेको तस्बिर पनि सार्वजानिक भएको छ । सो तस्बिरहरु सार्वजानिक भएसँगै उत्तर कोरियाको अर्को योजना बारे विभिन्न आंकलन लगाइएका छन् । अब किम के को तयारी गरिरहेका छन् ? उनी किन शिखर भ्रमणमा गए ? भन्ने प्रश्नले विश्वमा चिन्ता बढाइरहेको छ । उनले पनि उत्तर कोरियाको भुगोलमा आइरहेका बदलावहरु महसुस गरिसकेकाले यसैसम्बन्धी अध्ययन गर्न गएको हुन सक्ने विश्वविद्हरुले बताइरहेका छन् ।