काठमाडौं । साउदी अरबले ३५ वर्ष लामो चलचित्रमाथिको प्रतिबन्ध हटाउने घोषणा गरेको छ । साउदीका शक्तिशाली राजकुमार मोहोम्मद बिन सलमानले सामाजिक तथा आर्थिक सुधार ल्याउनका निम्ति यस्तो कदम उठाएको बताइएको छ । आगामी २०१८ देखि नै साउदीले राज्यभरि सिनेमा संचालन गर्ने र सबै सिनेमाघरमा तत्कालै लाइसेन्स जारी गराउने सूचना तथा संस्कृति मन्त्रालयले जानकारी गराएको हो ।
साउदीमा रुढिवादी समाजले लगातार विरोध गरिरहेको भएपनि भिजन २०३० अन्र्तगत साउदीका राजकुमारले मनोरञ्जनलाई बढी प्राथमिकता दिइरहेका छन् । यस भन्दा अघि पनि राजकुमारले महिलाहरुलाई गाडि चलाउने अनुमति दिएका थिए । उनको यस्तो फैसला भिजन २०३० अभियान कार्यक्रमको एउटा भाग रहेको उनले बताएका हुन् ।
तर त्यहाँका अधिकांश रुढिवादी समजामा भने सिनेमाले सांस्कृतिक र धार्मिक पहिचानलाई संकटमा ल्याउछ भन्ने मानसिकता रहेको छ । यसैकारण १९८० देखि त्यहाँ चलचित्रमाथि प्रतिबन्ध लगाइएको थियो । समाजको नौतिकता खतम हुन्छ भन्दै गत वर्ष पनि उनीहरुले सिनेमाघर नचलाउन चेतावनी दिएका थिए । अहिले भने विरोधका बाबजुद राजकुमार सलमानले यसबारे निर्णय लिइसकेका छन् । अब यसपछि सन् २०३० सम्ममा साउदीका ३०० चलचित्र घरमा २ हजार भन्दा धेरै स्क्रीन सुरु हुने अनुमान गरिएको छ ।