काठमडौं । नेपालका लागि युरोपियन युनियनका राजदूत भेरोनीकाकोडिले नेपालको समुचित आर्थिक विकासका साथै व्यवसाय प्रवद्र्धनको लागि युरोपियन युनियनको तर्फबाट सहयोग निरन्तर हुने बताएकी छिन् ।
नेपाल उद्योग परिसंघका पदाधिकारीहरुसँग काठमाडौं स्थित आफ्नै कार्यकक्षमा मंलबार भएको भेटवार्ता राजदूत कोडिले सहयोग गर्ने प्रतिवद्धता जनाइएकी थिइन् ।
उनले नेपालको संविधानको कार्यान्वयनको क्रममा हालै शान्तिपूर्ण रुपमा सम्पन्न केन्द्र, प्रदेश र स्थानीयतहको निर्वाचनपछि देशमा विकासको सम्भावनाको साथै लगानीकर्ताहरुमा विश्वास बढेको बताइन् ।
त्यस्तै उनले नेपालको जनस्वास्थ्य, शिक्षा क्षेत्र, लगायत निजी व्यवसाय प्रवद्र्धनको लागि समेत युरोपियन युनियनले सहयोग गर्ने धारणा व्यक्त गरेकी जनाइएको छ । सो अवसरमा युरोपियन युनियन बैंकको सञ्चालनको सम्भावनाको समेत अध्ययन भइरहेको उनले जानकारी दिइन् ।
भेटवार्तामा परिसंघका अध्यक्ष हरिभक्त शर्माले नेपालको राजनीतिक स्थायित्व भएसँगै आर्थिक एजेण्डालाई अबको सरकार र राजनीतिक दलले प्राथमिकता राखेको पाइएको बताए । सो कारण निजी क्षेत्रको संस्थागत विकासमा युरोपियन संघ जस्ता विकास साझेदार संस्थाहरुको सहयोग अर्थपूर्ण रहने उनको भनाइ छ ।
परिसंघले विगत तीन वर्षदेखि युरोपियन युनियनको सहयोगमा नेपालको निकासी प्रवद्र्धनको उद्देश्यले स–साना परियोजनाका साथै दुईवटा पूर्वाधार सम्मेलन समेत सफलतापूर्वक सम्पन्न गरेको जानकारी दिए । उद्योगको उत्पादन वृद्धि, गुणस्तर सुधार गर्ने उद्देश्यले ‘औद्योगिक एक्सिलेन्स केन्द्र’ को सञ्चालनको काम अघि बढाउने कार्यक्रम समेत सञ्चालन गरिसकेको उनको भनाइ छ ।