काठमाडौं । भर्खरै सम्पन्न प्रतिनिधिसभा र प्रदेशसभा निर्वाचनमा सरकारले नेतृत्व गरिरहेको दल नेपाली कांग्रेसले नराम्रोसँग पराजय बेहोरेको छ । प्रतिनिधिसभातर्फ १ सय ६५ निर्वाचन क्षेत्रमा भएको निर्वाचनमा कांग्रेसले अहिलेसम्म १ सय ४३ क्षेत्रमा पराजय बेहोरिसकेको छ । अन्तिम मतपरिणाम सार्वजनिक हुन बाँकी रहेका पाँच निर्वाचन क्षेत्रमा पनि कांग्रेसले पराजय भोग्ने निश्चितप्रायः छ । 

कांग्रेसले प्रतिनिधिसभा सदस्यका लागि अघि सारेका उमेदवारहरु ४७ देखि ३० हजार मतान्तरले पराजित भएका छन् । सबैभन्दा कम मतान्तरले हुम्लामा र सबैभन्दा धेरै मतान्तरले देलखामा कांग्रेसले पराजय बेहोरेको छ । सबैभन्दा थोरै मतको अन्तरले हुम्लाका उमेदवार मंगलबहादुर शाही पराजित भएका छन् । उनी स्वतन्त्र उमेदवार छक्कबहादुर लामासँग ४७ मतले पराजित भएका हुन् । 

यस्तै कांग्रेसबाट उमेदवारी दिएका नेतामध्ये दोलखाका रुद्रबहादुर खड्का सबैभन्दा बढी मतान्तरले हारेका छन् । उनी नेकपा एमालेका उमेदवार पार्वत गरुङसँग ३० हजार ६४४ मतले हारेका हुन् । एमाले उमेदवार गुरुङले ५५ हजार ४५७ मत ल्याउँदै कांग्रेसका खड्काले २४ हजार ८१३ मतमा चित्त बुझाउनु परेको छ । 

कांग्रेसमा ६ जना उमेदवारहरु एक हजारभन्दा कम मतले कम्युनिष्ट गठबन्धन र मधेसवादी दलसँग पराजित हुनु परेको छ । ५ जना उमेदवारहरुलाई कम्युनिष्ट गठबन्धनका संयुक्त उमेदवारले हराएका छन् भने एक जना उमेदवार राष्ट्रिय जनता पार्टी नेपालका उमेदवारसँग झिनो मतअन्तरले पराजित भएका छन् । 

कांग्रेस नेताहरु डा. शेखर कोइराला, रमेश लेखक, नवीन्द्रराज जोशी, दीपकुमार उपाध्याय, मंगलबहादुर शाही र दिलमान पाख्रिन एक हजारभन्दा थोरै मतले हार्ने उमेदवारहरु हुन् । डा. कोइराला मोरङ निर्वाचन क्षेत्र नम्बर ६ मा नेकपा एमालेका नेता लालबाबु पण्डितसँग ६७५ मतले पराजित भएका छन् । उनले ३३ हजार २६६ मत प्राप्त गरेको निर्वाचन आयोगले जनाएको छ । 

नेता लेखक कञ्चनपुर निर्वाचन क्षेत्र नम्बर ३ बाट एमाले उमेदवार डा. दीपकप्रकाश भट्टसँग २५८ मतले हारेका छन् । उनले कुल खसेको मतमध्ये २६ हजार १०६ मत ल्याएका छन् । 

राजदूतबाट राजीनामा दिएर कपिलवस्तु–१ बाट प्रतिनिधिसभा सदस्यका लागि चुनावमा होमिएका दीपकुमार उपाध्यायले पनि ९४६ मत अन्तरले हार बेहोेर्नुपरेको छ । उपाध्यायले २८ हजार ८५३ मत प्राप्त गरेका थिए । त्यस्तै कांग्रेसका अर्का नेता नवीन्द्रराज जोशी काठमाडौं निर्वाचन क्षेत्र नम्बर ८ बाट एमालेका जीवनराम श्रेष्ठसँग पराजित भएका छन् । १२ हजार ९५३ मत ल्याएर जोशी श्रेष्ठसँग ४२६ मतले पराजित भएका हुन् । 

यसै गरी कांग्रेस नेता दिलमान पाख्रिनलाई हराउँदै एमाले नेता खेमप्रसाद लोहनी प्रतिनिधिसभा सदस्यमा निर्वाचित भएका छन् । लोहनीसँग ६४० मते पछि परेका पाख्रिनले ३५ हजार ६१६ मत प्राप्त गरेका छन् । सत्तारुढ कांग्रेस सबैभन्दा थोरै मतान्तरले हुम्लामा पराजित हुन पुगेको छ । हुम्लामा कांग्रेस नेता मंगलबहादुर शाहीलाई स्वतन्त्र उमेदवार छक्कबहादुर लामाले ४७ मतले पछि पारेर प्रतिनिधिसभाको यात्रा तय गरेका हुन् । लामाले आठ हजार ४९१ मत ल्याउँदा कांग्रेस उमेदवार शाहीले आठ हजार ४४४ मत ल्याएका थिए । 

समाचार तयार पार्दासम्म कांग्रेस नेता विजयकुमार गच्छदार पनि १५५ मतले पछि छन् । उनले २९ हजार १७१ मत ल्याउँदा एमाले नेतृ भगवती चौधरी १९ हजार ३२६ मतका साथ अग्रता लिइरहेकी छन् ।