चितवन । नेकपा माओवादी केन्द्रका अध्यक्ष तथा चितवन क्षेत्र ३ को प्रतिनिधिसभामा विजयी हुन सफल पुष्पकमल दाहाल ‘प्रचण्ड’ ले सरकार गठन र पार्टी एकता सँगसँगै हुने बताएका छन् ।
विजयी भएपछि बाह्रखरीका प्रतिनिधिसँगको संवादमा उनले यस्तो बताएका हुन् ।

चुनावलगत्तै माओवादी केन्द्र र नेकपा एमाले पार्टी एकीकरण हुने भन्दै अध्यक्ष दाहाल र एमाले अध्यक्ष केपी ओलीले चुनावी प्रचार गरेका थिए ।
प्रचार गरेअनुसार निकट भविष्यमै सरकार गठन र पार्टी एक हुनेमा विश्वस्त हुन प्रचण्डले आग्रह गरे ।

नेतृत्वको इच्छाशक्ति भएमा पार्टी एकता नौलो विषय नभएको उल्लेख गर्दे नेता प्रचण्डले भने, “जनता र कार्यकर्ताको भावनाको सम्मान गर्न पनि पार्टी एकीकरण आवश्यक छ ।”
माओवादी र एमाले मिले भने देश बनाउँछन् भन्ने विश्वासका साथ जनताले अत्यधिक मतले जिताएको प्रचण्डको भनाइ छ ।

पार्टी एक नभएसम्म जनताले चाहेको राजनीतिक स्थायित्व र विकास सम्भव नहुने भन्दै प्रचण्डले देशको समृद्धिका लागि नै पार्टी एकता गर्न लागिएको बताए । 

यसअघि कम्युनिस्ट पार्टी नमिल्दा देशवासीले चाहेअनुसार विकास र समृद्धि नभएको बताउँदै अध्यक्ष प्रचण्डले जनचाहनाअनुसार नै पार्टी एकता गर्न लागेको बताए ।
इतिहासको तीता अनुभवबाट पाठ सिकेर विभिन्न समयमा पैदा भएका कठिनाइहरु मनन गरी अघि बढ्नुपर्ने उनको भनाइ छ ।
“नेतृत्वको इच्छाशक्तिबाट एकता हुन्छ । नेतृत्वले कार्यकर्ता र जनताको भावनालाई सम्मान गर्र्नुपर्छ,” उनले भने । 

त्यस्तै पूर्वप्रधानमन्त्रीसमेत रहेका माओवादी केन्द्रका अध्यक्ष प्रचण्डले चुनावअघि भएका सबै प्रतिबद्धता क्रमशः पूरा हुँदै जाने बताएका छन् ।
प्रचण्डले भने, “चुनावमा प्रस्तुत गरिएका केही एजेण्डा महत्वाकांक्षी पनि छन्, तर ती पूरा हुन्छन् ढुक्क रहनुुहोस् ।”
प्रचण्डले जनयुद्धको सपना अझै पूरा नभएको बताएका छन् । समाजवाद र साम्यवादको यात्रा पूरा गर्नुपर्ने भन्दै उनले दीर्घकालीन प्रक्रिया र क्रान्तिबाट मात्र यो उद्देश्य सम्भव रहेको बताए । 
जनयुद्धले परिकल्पना गरेअनुसार संविधानसभाबाट सविधान बनाउने, देशमा गणतन्त्र ल्याउने, संघीयतामा लैजाने, संविधान कार्यान्वयन गर्नेजस्ता सपना मुलभूतरुपमा पूरा भएको उनले उल्लेख गरे ।
चितवनको विकासका लागि प्रशस्त सम्भावना र योजनाहरु रहेको उनको भनाइ छ । नारायणी नदी, रिउ र राप्ती तटबन्ध रिङरोड र लिंक रोड बनाउने सपना छिट्टै पूरा हुने आश्वासन पनि उनले दिए ।
सुकुुम्बासी व्यवस्थापन देशको प्रमुख समस्या रहेकाले यसको समाधानका लागि अब बन्ने सरकारले पहिलो एजेण्डा बनाउने उनले बताए ।
उनले भने, “सुकुम्बासी समस्या समाधान कार्यलाई अघि बढाउने छ । पूर्जा वितरण सम्भव भए बाँड्ने, नत्र स्थानान्तरण गर्ने र कतिपयलाई तालिम र रोजगारीका वैकल्पिक व्यवस्था गरी राज्यले आवासको व्यवस्था गर्छ ।”