काठमाडौं । नयाँ संरचनाअनुसार पहिलोपटक भएको प्रतिनिधिसभा र प्रदेशसभाको चुनावमा खेलकुद क्षेत्रका व्यक्तिको पनि उल्लेखनीय सहभागिता रह्यो । उमेदवार भएका कुनै खेलकर्मीले जिते भने कुनै खेलकर्मी पराजित भए ।
चुनाव जितेका खेलकर्मी
जीवनराम श्रेष्ठ
काठमाडौं क्षेत्र ८ को प्रतिनिधिसभामा एमाले उमेदवार जीवनराम श्रेष्ठले जित हात पार्न सफल भए । नेपाल ओलम्पिक कमिटिका अध्यक्षसमेत रहेका श्रेष्ठले लोकतान्त्रिक गठबन्धनका तर्फबाट उमेदवार बनेका कांग्रेसका नविन्द्रराज जोशीलाई पराजित गरे ।
श्रेष्ठले १३ हजार ५ सय ९७ मत ल्याए । श्रेष्ठले जोशीलाई ६ सय ४४ मतले पछि पारेका थिए । यो क्षेत्रबाट दुई पटक निर्वाचित जोशीले १२ हजार ९ सय ५३ मत प्राप्त गरे । विवेकशील साझाका पुकार बमले ४ हजार ४१४ मत ल्याए ।
खेलकुदको नीति निर्माण गर्दै खेलकुद क्षेत्रको विकासको लागि नेपाललाई आकर्षणको केन्द्र बनाउने र खेलाडीको जीवन गौरवका साथ सुनिश्चितता गराउने एजेन्डा रहेको श्रेष्ठले बताउँदै आएका छन् ।
सुरेन्द्र हमाल
ओलम्पियन खेलाडी सुरेन्द्र हमाल बाँके क्षेत्र नम्बर २ (ख) प्रदेश सभाका लागि निर्वाचित भएका छन् । उनले ९२११ मत प्राप्त गरी जित हात पारेका हुन् । उनका निकटतम प्रतिद्धन्दी एमालेका विजय कुमार गुप्ताले ८ हजार ४३२ मत पाए ।
भारोत्तोलन ओलम्पियन खेलाडी हमालले नेपाली खेलकुदमा दिर्घकालिन योजना बनाउँदै अन्तर्राष्ट्रिय स्तरमा राम्रो प्रभाव पार्ने बताउँदै आएका छन् ।
दीपक कोइराला
कास्की क्षेत्र नम्बर १ को प्रदेश (क) मा नेकपा माओवादी केन्द्रका दीपक कोइराला विजयी भएका छन् । विजयी कोइरालाले १८ हजार ७ सय २७ मत प्राप्त गरे भने उनका निकटतम प्रतिष्पर्धी कांग्रेसका जीवन परियारले १५ हजार ८१ मत प्राप्त गरे ।
उनले कांग्रेसका परियारलाई ३ हजार ६ सय ४६ मतान्तरले हराउँदै विजय हासिल गरेका हुन् ।
कोइराला नेपाल क्रिकेट संघ (क्यान) का पूर्व कार्यवाहक अध्यक्ष तथा क्षेत्रीय खेलकुद विकास समितिका अध्यक्ष हुन् । पोखरालाई खेल सहरको रुपमा विकास गर्ने उनको योजना छ ।
चुनाव हारेका खेलकर्मी
इन्द्रमान तुलाधर
अखिल नेपाल फुटबल संघ (एन्फा) का प्रमुख कार्यकारी अघिकृत इन्द्रमान तुलाधर राजीनामा दिएर चुनावमा होमिए थिए । तर, उनी पराजित भएका छन् । उनी एमालेका अजयक्रान्ति शाक्यसँग पराजित भए । काठमाडौं क्षेत्र नम्बर ९ को क प्रदेशतर्फ कांग्रेसबाट चुनाव लडेका इन्द्रमान तुलाधरले ७१९३ मत प्राप्त गरे भने शाक्यले ९५३१ मत पाए ।
किशोर राई
अखिल नेपाल फुटबल संघ (एन्फा) का उपाध्यक्ष किशोर राई सुनसरी क्षेत्र नम्बर १ को क मा पराजित भए । राई बाम गठबन्धनका प्रदीप भण्डारीसँग ५ हजार ४७३ मतान्तरले पराजित भएका हुन् । भण्डारीले १९ हजार २४३ मत प्राप्त गर्दा राईले १३ हजार ७७० मत प्राप्त गरे ।
राजीवविक्रम शाह
जाजरकोटबाट प्रतिनिधिसभा सदस्यमा उमेदवारी दिएका नेपाली कांग्रेसका राजीवविक्रम शाह पराजित भएका छन् । नेपाल एथलेटिक्स संघका अध्यक्षसमेत रहेका शाह बाम गठबन्धनका शक्तिबहादुर बस्नेतसँग ८ हजार ९९२ मतान्तरले पराजित भएका हुन् । माओवादी केन्द्रका बस्नेतले ३२ हजार २८१ मत प्राप्त गर्दा शाहले २३ हजार २८९ मत पाए ।