काठमाडौं । एसीसी यु–१६ इस्टर्न रिजन क्रिकेटको दोस्रो खेलमा हङकङले नेपाललाई जितका लागि ८३ रनको लक्ष्य प्रस्तुत गरेको छ । हङकङले दिएको ८३ रनको लक्ष्यसहित नेपालले केही बेरमा जवाफी ब्याटिङ गर्नेछ ।
बैंककस्थित ट्रेडथाई क्रिकेट मैदानमा टस जितेर पहिले ब्याटिङ गरेको हङकङले पूरै ३५ ओभरमा ९ विकेट गुमाएर ८२ रन बनायो । खराब सुरुवात गरेको हङकङको सम्मानजनक स्कोरमा आर्यन शरद शेट्टीले २४ रनको योगदान गरे । शून्य रनमा ओपनर तेजनारायणलाई गुमाएको हङकङको लागि कालहन मार्क चल्लुले १६, आरुष भागवतले १२ रन जोड्दा कप्तान आदित गोरावाराले ७ रन बनाए । हङकङका ४ ब्याट्सम्यान सुन्य रनमा पेभेलियन फर्किएका थिए ।
हङकङलाई सस्तैमा समेट्न नेपालका प्रतिष जिसीले ३ तथा अजय कुमार लोनियाले २ विकेट लिए । त्यस्तै निखिल कुमार सिंह र नारायण जोशीले समान १ – १ विकेट झारे ।
पहिलो खेलमा आयोजक थाइल्याण्डलाई पराजित गरेको नेपाल आज हङकङलाई पराजित गर्दै दोस्रो जितको खोजीमा रहनेछ । सोमबार भएको पहिलो खेलमा थाइल्याण्डलाई १३३ रनले पराजित गरेको नेपाल हङकङमाथि जित निकाल्दै दोस्रो चरणमा पुग्ने सम्भावना बलियो बनाउन चाहन्छ ।
यता, नेपालविरुद्ध मैदान उत्रँदा हङकङ पनि लगातार दोस्रो जितको खोजीमा हुनेछ । नेपालको लागि समूहकै बलियो प्रतिद्वन्द्वी हङकङले सोमबार भएको पहिलो खेलमा म्यानमारलाई २१२ रनले पराजित गरेको थियो ।
एसियाका ८ राष्ट्रले प्रतिस्पर्धा गर्ने प्रतियोगिताको समूह ‘ए’ मा हङकङ २ अंकसहित शिर्ष स्थानमा छ । हङकङसँग समान २ अंक जोडेपनि नेपाल नेट रनरेटमा पछि पर्दै दोस्रो स्थानमा छ । थाइल्याण्ड र म्यानमार अंक बिहिन छ ।
प्रतियोगिताको अन्तिम खेलमा नेपालले बिहिबार म्यानमारसँग खेल्नेछ । लिग खेलपछि समूहको शिर्ष दुई टोली सेमिफाइनलमा पुग्नेछन् । समूह ‘बि’ मा मलेसिया, भुटान, चीन र सिंगापुर रहेका छन् ।