धनगढी । कुनैपनि खेलाडीको लागि राष्ट्रको जर्सीमा देशको प्रतिनिधित्व गर्दै मैदान उत्रनु गर्वको कुरा हुन्छ । र, सबै खेलाडीले राष्ट्रको जर्सीमा मैदान उत्रने मौका हतपत पाउँदैनन ।
देशको लागि मैदान उत्रने सौभाग्य कमै खेलाडीले पाउँछन् । अझ, देशको लागि डेब्यु खेलमा उत्कृष्ट प्रदर्शन गर्दै टोलीको जितमा नायक बन्ने अवसर पाउनु अहोभाग्य हो । तर, धनगढीका युवा क्रिकेटर नारायण जोशीले डेब्यु खेलमा नायक बन्ने सौभाग्य पाए ।
एसियाली क्रिकेट परिसद (एसीसी) ले थाइल्याण्डमा संचालन गरिरहेको एसीसी यु–१६ इस्टर्न रिजनको पहिलो खेलमा नेपालले जित निकाल्दा नायक बने नारायण जोशी ।
आयोजक थाइल्याण्डविरुद्ध १३३ रनको फराकिलो जितमा नारायण म्यान अफ दि म्याच समेत चुनिए । र, अलराउन्डर नारायणले नेपालको लागि पहिलो खेलमै आफु प्रतिभाशाली रहेको प्रमाणित गरे ।
बैंककस्थित ट्रेडथाई मैदानमा नेपालले १७९ रनको स्कोर बनाउदा अलराउण्डर जोशी ब्याटिङमा भने जम्न सकेनन् । तर, जब नारायण बलिङ गर्न आए, थाइल्याण्डका ब्याट्सम्यान निरिह बने । नारायणको वलिङ जादु चल्दा नेपालले थाइल्याण्डलाई ४६ रनमा अलआउट गर्यो ।
टस जितेर पहिले ब्याटिङ गरेको नेपालका लागि डेब्यु खेलमा नारायणले छैटौ नम्बरमा ब्याटिङको मौका पाए । नेपालले ५ विकेटको क्षतिमा १२० रन जोड्दा क्रिजमा आएका नारायण सातौं विकेटका रुपमा आउट भए । जतिबेला नेपालको स्कोर १२९ रन थियो । चिराङ फोङको वलमा कोकिएट च्यटवाङको हातवाट क्याच आउट हुनु अघि नारायणले १० बलमा ६ रन बनाएर पेलिभियन फर्किए । ६ रन बनाउदा नारायणको नाममा एक चौका रह्यो ।
उमेर समुहमा पनि कमजोर ब्याटिङ प्रदर्शन गरेको नेपाललाई जिताउन भने नारायणकै बलिङ निर्णायक भयो । थाइल्याण्डलाई ४६ रनमा समेट्नका लागि नारायण एक्लैले ५ विकेट लिए । ७ ओभर वलिङ गरेका उनले मात्र १७ रन खर्चिए ।
नारायणले थाईल्याण्डका सुरुवाती व्याट्सम्यान फिरीयोङ संचाई, थिराफाट कोङथोङ र कोङकिटाकोङ र रिङगोचाईलाई खाता खोल्न नदिएर शुन्यमै आउट गरे । रन आउटबाट चौथो विकेट गुमाएको थाईल्याण्डका लागि पाँचौ र छैटौ विकेट पनि नारायणले नै लिए । उनले लिएका ५ विकेटमा एक विकेट क्याच थियो भने चार जनालाई वोल्ड आउट गराए ।
नेपालको लागि डेब्यु खेलमै कसिलो बलिङ गरेपछि नारायणको चर्चा चुलिएको छ । डेब्यु खेलमै म्यान अफ दि म्याच भएपछि धनगढीमा रहेका उनका सहपाटीहरुमाझ नारायण चर्चाका पात्र बनेका छन् । धनगढी क्रिकेट एकेडेमीको उत्पादन नारायण ७ नम्बर प्रदेशबाट एसीसी यु – १६ टोलीमा पर्ने दुई खेलाडीमध्ये एक हुन् । यु–१६ टोलीमा धनगढीबाट नारायणसँगै सुवोध ऐर पनि टोलीमा परेका छन् ।
धनगढीस्थित ऐश्वर्य विद्या निकेतनमा पढ्ने वेलादेखि क्रिकेट खेल्ने नारायण कैलाली जिल्लामा आयोजना हुने विद्यालय स्तरीय प्रतियोगितामा धेरै पटक उत्कृष्ट खेलाडी भईसकेका छन । उनको उत्कृष्ट प्रदर्शन देखेर धनगढी क्रिकेट एकेडेमीले उनलाई तीन वर्षदेखि निशुल्क रुपमा छात्रवृति दिएर प्रशिक्षण दिईरहेको छ । नारायण धनगढी क्रिकेट लिगमा टीम क्याम्पसरोडवाट अक्सनमा खरिद भएर उमेर समुहमै सिनियर खेलाडीहरुसँग खेल्दै आएका थिए ।
धनगढीको सुदुरपश्चिमाञ्चल एकेडेमीमा अध्यानरत नारायण क्रिकेटमा सम्भावना बोकेका युवा प्रतिभा भएकै कारण छात्रवृतिमा पढिरहेका छन् । नारायणको प्रतिभा देखेरै देशकै सर्वा्धिक ठुलो धनराशीको क्रिकेट प्रतियोगिता आयोजना गर्दै आएको सुदरपश्चिमाञ्चल एकेडेमीले उनलाई निशुल्क अध्ययनको व्यवस्था गरेको हो ।
थाइल्याण्डमा नारायणको प्रदर्शनपछि एकेडमीका निर्देशक तथा धनगढी क्रिकेट एकेडेमीका अध्यक्ष सुवाश शाहीले नारायणले पहिलो खेलमै आफ्नो क्षमता देखाएको र उनको प्रदर्शनबाट धनगढीबासीखुशी रहेको बताए । नारायणको पहिलो अन्तराष्ट्रिय प्रदर्शनको प्रशंसा गर्दै अध्यक्ष शाहीले भने, “नारायणले आफ्नो क्षमतालाई अन्तराष्ट्रिय स्तरसम्म पुर्याउँदै उत्कष्ट खेल कौशलता देखाएको छ । नारायणको आगामी खेलमा अझ राम्रो प्रदर्शन हुने आशा राखेको छु ।”