काठमाडौं । उत्तर कोरियाका नेता किम जोङ उनमाथि कुनै पनि अन्तर्राष्ट्रिय दबाबले काम नगरिरहेका बेला दक्षिणले पनि यसका लागि छुट्टै तयारी गरिरहेको बताएको छ । बारम्बार प्रतिबन्ध लगाइए पनि लगातार आणविक हतियार र मिसाइल परीक्षणमै व्यस्त भइरहेको उत्तर कोरियाको सम्भावित् आक्रमणबाट बच्न दक्षिणले आधुनिक साधनको मद्दत लिने बताएको हो । 

दक्षिण कोरियाको समाचार एजेन्सी योनहापका अनुसार आगामी २०१८ को अन्त्य सम्ममा उनीहरुले मानवरहित विमान, ‘ड्रोन रोबोट’ को एउटा फौज तयार पार्नेछन् ।

यसरी तयार गरिने ड्रोन रोबोटको फौजले आजसम्म हुँदै आइरहेका सम्पूर्ण लडाई र युद्धहरुको स्वरुप नै फेरिदिने बताइएको छ । लडाईको यो नयाँ तरिकाबाट दक्षिण कोरियाले जासूसी र प्रतिरक्षाको क्षमता वृद्धि गराउन सक्नेछ । दक्षिणका अधिकारीहरुले बताएअनुसार उत्तर कोरियाको गतिविधि हेरेर यस्ता आधुनिक यन्त्रमा छिट्टै नै अग्रता हासिल गर्न जरुरी भइसकेको छ । 

यता दक्षिण कोरियाका राष्ट्रपति मुन जे इनले भने देशमा आणविक हतियारको निर्माणमा रोक लगाइरहेका छन् । अहिले उनी देशका सेनाहरुको सङ्ख्या घटाएर प्राविधिक विकासतर्फ मात्र बढी केन्द्रित भइरहेका छन् ।  यस्तोमा उनका नजिकी अधिकारीहरुले भने उनलाई उत्तर कोरियासँग हतियार र ताकतको सन्तुलन भएमात्र कोरियाली प्रायद्वीपमा शान्ति कायम गर्न सकिन्छ भन्दै दबाब दिइरहेका छन् ।

त्यसकारण पनि सेनाको शक्ति बराबरको ड्रोन रोबोटको विकासलाई वृद्धि गराउन जोड दिइएको छ । त्यसमा बम राखेर हमला समेत गर्न सकिने भएकाले पनि यो तरिका प्रभावकारी साबित हुने प्रविधिक अधिकारीहरुले दाबी गरेका छन् ।

दक्षिण कोरियाले निर्माण गर्न लागेको ड्रोन इजरायलले २०१० मा बनाएको मोडलजस्तो हुने बताइएको छ । भाविष्यका खतरालाई हेरेर केही नयाँ योजना बनाउनै पर्ने भएकाले पनि दक्षिण कोरियाले यो नयाँ प्रविधि अपनाउन लागेको बताइएको छ । प्राविधिक विज्ञहरुका अनुसार हजारौँ ड्रोनहरुलाई एक अर्कासँग सम्पर्कमा राखेर एकैसाथ उडाउने हो भने यसको माध्यमले वरिपरिका विमान वा जहाजहरुलाई समेत रोक्न सकिनेछ ।