काठमाडौं । गतसाता बेलायतले, यूरोपियन यूनियनबाट निस्कन गरेको ब्रेक्जिट सम्झौता सम्बन्धी वार्ता अन्तिम चरणमा पुगेर व्यावसायिक छलफल मात्र गर्न बाँकी भएको बताइएको थियो । यसैबीच यूरोपियन यूनियनसँगको सम्बन्ध विच्छेद रकमको पनि ठूलो चर्चा भएको हो । बेलायतले यूरोपियन यूनियन छाडेकामा ३५ देखि ३९ बिलियन पाउन्ड बराबरको रकम तिर्नुपर्ने खबर सार्वजनिक भएसँगै बेलायती प्रधानमन्त्री टेरेजा मेले चारैतिरबाट दबाबको सामना गर्नुपरेको थियो । यसैबारेमा बिहीबार बस्ने भनिएको बैठकमा भविष्यका धेरै विषयबारे छलफल गरिने टेरेजाले बताएकी छन् । उनको यस बयानपछि उनी ब्रेक्जिट सम्झौताबारे अझै आशावादी रहेको प्रस्ट देखिन्छ ।  
२०१६ मा ब्रिटेनले यूरोपियन यूनियनबाट बाहिरिने ब्रेक्जिट सम्झौतामा बहुमत हासिल गरेपछि यो विषय लामो समयसम्म विवादित बन्न पुगेको थियो । अहिले यसबारेमा भएका वार्ता सफल हुँदै जाँदा यसका परिणामबारे थुप्रै प्रतिक्रियाहरु आइरहेका छन् ।

पहिलो  चरणको वार्तापछि अब व्यवसायिक छलफल गर्न बिहिबार अर्को बैठक बस्ने बताइएको छ । यता ब्रिटेन यूरोपियन यूनियनबाट छुट्टिने लगभग पक्का देखिएपछि उत्तरी आयरल्यान्डको भविष्य चाहिँ अनिश्चित बन्दै गएकामा धेरैले चिन्ता व्यक्त गरेका छन् । 

अहिले ब्रिटेन यूरोपियन यूनियनबाट बाहिरिने भएपछि उत्तरी आयरल्यान्डमा यसले पार्ने नकारात्मक प्रभाव सम्बन्धी धेरै कुरा भइरहेका छन् । सीमा क्षेत्रलाई लिएर सबैभन्दा प्रमुख समस्या आइलाग्ने भएपछि प्रधानमन्त्री टेरेजा आफ्नै पार्टीबाट समेत आलोचित भएकी थिइन् । यसका साथै ब्रिटेन र रिपब्लिक अफ आयरल्यान्डको अनि अर्कोतर्फ उत्तरी आयरल्यान्ड र रिपब्लिक आयरल्यान्डबीचको सम्बन्धलाई जोगाउनु पनि ब्रेक्जिट सम्झौताका लागि ठूलो चुनौति हुनेछ । 

यस बारेमा ब्रिटेनकी प्रधानमन्त्री टेरेजाले आइरिस सीमा क्षेत्रको समस्यालाई समाधान गर्ने र दुई देशबीचको कूटनीतिक सम्बन्ध पनि नबिगार्ने वचन दिएकी छन् । उनले भनिन् , ‘ यो प्रक्रिया धेरै कठिन हुनेछ भनेर म पहिलेदेखि नै तयारी अवस्थामा थिएँ । यसमा यूरोपियन यूनियन र बेलायत एकसाथ हुने हो भने यसले दुवैका लागि राम्रो नतिजा ल्याउनेछ । त्यसैले पनि हाम्रो वार्ता सफल हुन सकेको हो । यो प्रक्रिया सुरु हुनु अघि हामीले यत्तिको सफलता हासिल गर्न सक्नेछौँ भन्ने कसैले सोचेको थिएन । त्यसकारण अब यसलाई सम्भव बनाउन थोरै कार्यहरु मात्र बाँकी छन् ।’ आगामी २०१९ को मार्च महिनाभित्रै बेलायतले यूरोपियन यूनियन छाड्ने जानकारी दिइएको छ ।