काठमाडौं । राजधानीमा जारी सहिद स्मारक बि डिभिजन लिग फुटबलमा पुल्चोक स्पोर्ट्स क्लबले दोस्रो जित हासिल गरेको छ । आइतबार भएको सामाजिक युवा क्लबलाई ४–१ ले पराजित गर्दै पुल्चोकले लिगमा दोस्रो जित हासिल गरेको हो ।

हल्चोकस्थित सशस्त्र प्रहरीको एपीएफ मैदानमा भएको खेलमा पुल्चोकलाई जित दिलाउन कमल थापा, मिलन गुरुङ, आशिष गुरुङ र पूर्णबहादुर गुरुङले समान एक एक गोल गरे । सामाजिकको लागि सुवाश तामाङले एक गोल फर्काए । जितसँगै पुल्चोकले ३ खेलबाट ६ अंक जोडेको छ । लिगको तेस्रो स्थानमा उक्लिएको छ । लिगमा समान ७–७ अंक जोडेको एनआरटी र आरसीटी क्रमसः पहिलो र दोस्रो स्थानमा छन् । 

यस्तै एपीएफ मैदानमा भएको अर्को खेलमा खुमलटार युथ क्लब र बाँसवारी फुटबल क्लबले १–१ गोलको बराबरी खेल्दै अंक बाडेका छन् । खेलमा बिनोद गुरुङको गोलबाट बाँसवारीले सुरुआती अग्रता लिएपनि जोगाउन नसक्दा बराबरीमा रोकिन पुग्यो । खुमलटारको लागि ठाकुर श्रेष्ठले पेनाल्टीबाट एक गोल फर्काए ।