एजेन्सी । एक दिवसीय अन्तर्राष्ट्रिय क्रिकेटबाट सन्यास लिएका श्रीलंकन क्रिकेटर तथा ब्याट्सम्यान तिलकरत्ने दिल्सानले आफ्नो अन्तिम एक दिवसीय खेलमा ४२ रन बनाएका छन् ।

श्रीलंकाको दम्बुलामा अहिले जारी अष्ट्रेलियाबिरुद्धको तेस्रो एकदिवसीय खेल दिल्सानको अन्तिम एकदिवसीय खेल हो । जुन खेलमा दिल्सानले ४२ रन बनाएर आउट भएका छन् । दिल्सानले आदम जाम्पाको बलमा आउट हुन्अघि ६५ बलमा ५ चौका प्रहार गरे ।

दिल्सानले यसअघि नै अष्ट्रेलियाबिरुद्धको आइतबार हुने एकदिवसीय आफ्नो अन्तिम अन्तराष्ट्रिय एकदिवसीय भएको बताइसकेका थिए । जारी, तेस्रो एकदिवसीयमा अहिले श्रीलंका ब्याटिङ गरिरहेको छ, यसअघिका दुई एकदिवसीय १–१ को अवस्थामा रहेको छ ।

अन्तिम एकदिवसीयमा ६२ रन बनाएपछि दिल्सानलाई हजारौ समर्थकहरुले सम्मान दर्शाएका थिए । त्यसअघि ब्याटिङ गर्न क्रिजमा छिर्दा सबै श्रीलंकन टिम मेटले उनलाई ब्याट उठाएर सम्मान गरेका थिए ।

दिल्सानले टेस्ट क्रिकेटबाट भने सन् २०१३ मै सन्यास लिइसकेका छन् । त्यस्तै उनले टि–ट्वान्टी अन्तर्राष्ट्रिय क्रिकेटमा भने आगामी सेप्टेम्बर ९ मा हुने अष्ट्रेलियाबिरुद्धको दोस्रो तथा अन्तिम टि–ट्वान्टी क्रिकेटपछि सन्यास लिनेछन् ।

३९ वर्षीय दिल्सानले सन् १९९९ मा जिम्बाबेबिरुद्धको एकदिवसीय क्रिकेटमा डेब्यु गरेका थिए । त्यस्तै उनले सन् २००६ मा इंग्ल्याण्डबिरुद्ध टि–ट्वान्टी क्रिकेटमा डेब्यु गरेका थिए । दिल्सानले एक दिवसीय क्रिकेटमा श्रीलंकाका लागि ३ सय २९ खेलबाट अहिलेसम्म १० हजार ३ सय रन जोडेका छन् । त्यसमा दिल्सानले २२ शतक र ४७ अर्धशतक बनाएका छन् ।

त्यस्तै दिल्सानले ७५ टि–ट्वान्टी १८ सय ३४ रन बनाएका छन् । त्यसक्रममा दिल्सानले १ शतक र १३ अर्धशतक बनाएका थिए ।