काठमाडौं । दोस्रो चरण अन्तर्गत कञ्चनपुरमा जारी प्रतिनिधिसभा तथा प्रदेशसभाको निर्वाचनमा अहिलेसम्म ४७ प्रतिशत मत खसेको छ ।
बिहान ७ बजेदेखि सुरु भएको मतदानमा दिउँसो २ बजेसम्म ४७ प्रतिशत मत खसेको जिल्ला प्रहरी कार्यालय कञ्चनपुरले जनाएको छ । जिल्ला प्रहरी कार्यालयका प्रहरी नायव निरीक्षक हरिसिाह धामीले अहिलेसम्म कुल मतदाता मध्ये एक लाख २३ हजार ७६३ जनाले मतदान गरिसकेको जानकारी दिए । तीन वटा निर्वाचन क्षेत्र रहेको कञ्चनपुरमा दुई लाख ६४ हजार ९७३ मतदाता रहेका छन् ।
जिल्ला निर्वाचन कार्यालयका निर्वाचन अधिकारी केशव भण्डारीले जिल्ला प्रहरी कार्यालयबाट आएको सूचना अनुसार नै आफूहरु पनि केन्द्रमा रिपोर्टिङ गरिएको बताएका छन् । उनले जिल्लामा शान्तिपूर्ण ढंगले मतदान चलिरहेको बताए ।
कञ्चनपुर निर्वाचन क्षेत्र नम्बर १ मा कम्युनिष्ट गठबन्धनबाट नेकपा माओवादीका बीना मगर र नेपाली कांग्रेसका दिवानसिंह विष्ट, क्षेत्र नम्बर २ बाट कम्युनिष्ट गठबन्धनका नरबहादुर धामी र कांग्रेसका एनपी सावद तथा क्षेत्र नम्बर ३ मा कम्युनिष्ट गठबन्धनका डा. दीपकप्रकाश भट्ट र कांग्रेसका रमेश लेखकबीच प्रतिनिधिसभा सदस्यका लागि प्रतिष्पर्धा भइरहेको छ ।