काठमाडौं । प्रतिनिधि सभा तथा प्रदेश सभाको दोस्रो चरणको चुनावमय देश बनिरहँदा खेलकुद क्षेत्रबाट उठेका उमेदवारले पनि मतदान गरेका छन् । 
चुनावी मैदानमा नेपाली खेलकुद जगतबाट उठेका खेलकर्मीले कुन कुन स्थानबाट मतदान गरे त ?

जीवनराम श्रेष्ठ
नेपाल ओलम्पिक कमिटिका अध्यक्ष जीवनराम श्रेष्ठले स्वयम्भुस्थित १५ नम्बर वडा भुइँखेल मतदान केन्द्रबाट मतदान गरेका छन् । विहानै उनले मतदान गरेका हुन् ।
जीवनराम श्रेष्ठ एमालेको तर्फबाट काठमाडौं क्षेत्र नम्बर ८ बाट प्रतिनिधी सभामा उठेका छन् । एमालेका केन्द्रीय सदस्य रहेका श्रेष्ठ राष्ट्रिय खेलकुद परिषद्का पूर्व सदस्य सचिव समेत भएका व्यक्ति हुन् ।
काठमाडौंका पुरातात्विक र सांस्कृतिक क्षेत्रको विकास तथा निर्माणमा आफ्नो भूमिका रहने बताएका जीवनरामले खेलकुदको विकास आफ्नो मुख्य एजेन्डा रहेको बताउँदै आएका छन् । 
इन्द्रमान तुलाधर
नेपाली कांग्रेसतर्फको काठमाडौं क्षेत्र नम्बर ९ (क) बाट प्रदेश सभाका लागि चुनावमा उठेका इन्द्रमान तुलाधरले संकटा मन्दिर,  टेवाल मतदान केन्द्रबाट मतदान गरेका छन् ।
विभिन्न मतदान केन्द्रमा जाँदा स्थानीय तहको तुलनामा निकै कम जनताको सहभागिता पाएको तुलाधरले बताए ।
इन्द्रमान तुलाधर अखिल नेपाल फुटबल संघ (एन्फा) का प्रमुख कार्यकारी अधिकृत तथा प्रवक्ताबाट राजीनामा दिएर चुनावमा होमिएका हुन् । खेलकुदको पृष्ठभूमिबाट आएकाले खेलकुदको पूर्वाधार विकास गर्ने आफ्नो मुख्य भूमिका रहने उनले बताउँदै आएका छन् ।

दिपक कोइराला 
माओवादी केन्द्रको तर्फबाट कास्की क्षेत्र नम्बर १ (क) को प्रदेश सभाबाट चुनावी मैदानमा उत्रिएका दिपक कोइरालाले विहानै मतदान गरेका छन् । उनले रामेश्वरी मावि मझेरीपाटन, पोखरा १४ बाट मतदान गरेका हुन् ।
कोइरालाले ५ हजारको मतान्तरले जित्ने दाबी गरे । स्थिर सरकार बनाउनुपर्छ भन्ने जनलहर देखिएको बताउँदै बाम गठबन्धनको जित सुनिश्चित भएको पनि दाबी गरे । 
कोइरालाले नेपाल क्रिकेट संघ (क्यान) मा उपाध्यक्ष हुदै कार्यबाहक अध्यक्ष समेत रहेर काम गरेका छन् । पोखरालाई खेल शहरको रुपमा विकास गर्ने उनले बताउँदै आएका छन् ।

सुरेन्द्र हमाल
नेपाली कांग्रेसबाट बाँके क्षेत्र नम्बर २ (ख) बाट प्रदेश सभाका लागि चुनाव लड्दै गरेका ओलम्पियन खेलाडी सुरेन्द्र हमालले आफ्नै निर्वाचन क्षेत्रबाट मतदान गरेका छन् । ओलम्पिन खेलाडी हमालले पानी ट्याङ्की मतदान केन्द्रबाट विहानै मतदान गरेका हुन् ।
हमालले आफ्नो जित सुनिश्चित भएको बताउँदै निकै मतअन्तरले जित्ने दाबी गरेका छन् । आफ्नो उमेदवारीले खेलाडीहरू पनि उत्साहित बनेको उनको तर्क छ ।

केशव स्थापित
नेकपा एमालेको तर्फबाट काठमाडौं क्षेत्र नम्बर ६ (क) बाट प्रदेश सभाका लागि चुनावी प्रतिस्पर्धामा उत्रिएका केशव स्थापितले विहानै आफ्नै निर्वाचन क्षेत्रबाट मतदान गरेका छन् । उनले बागबजारस्थित पद्यमकन्या क्याम्पसबाट विहानै मतदान गरेका छन् । उनले जित शुनिश्चित भएको पनि दाबी गरे ।
उनले विहानै मतदाताको कम उपस्थिति भएपनि दिउँसो निकै बाक्लो उपस्थिति रहेको बताए । आफूले मात्रै नभएर क्षेत्रै बामगठबन्धनले जित्ने दाबी गरे ।
स्थापित राष्ट्रिय खेलकुद परिषदका पूर्व सदस्य सचिव समेत हुन् । स्थापित काठमाडौं महानगरपालिकाका पूर्व मेयर पनि हुन् ।