एजेन्सी । च्याम्पियन्स लिग फुटबलको समूह चरणको अन्तिम खेलमा स्पेनिस क्लब रियल मड्रिडले बोरुसिया डर्टमण्डलाई पराजित गरेको छ । पोर्चुगिज फरवार्ड क्रिष्टियानो रोनाल्डोले च्याम्पियन्स लिग फुटबलमा अर्को किर्तिमान बनाएको खेलमा रियलले जर्मन क्लब डर्टमण्डमाथि ३ – २ को जित निकालेको हो ।

घरेलु मैदानमा भएको खेलमा रियलको जितमा बोर्जा मायोरल, क्रिष्टियानो रोनाल्डो र लुकास भाजक्वेजले समान एक एक गोल गरे । बोरुसिया डर्टमण्डका पिएर एमरिक औबामेयाङ एक्लैले दुई गोल गरे ।  सान्टियागो बेर्नाबेउमा खेलको आठौं मिनेटमा गोल मायोरलले गोल गर्दै रियललाई सुरुवाती अग्रता दिलाए ।

खेलको १२ औं मिनेटमा रोनाल्डोले रियलको अग्रता दोब्बर पारे । यो गोलसँगै रोनाल्डोले च्याम्पियन्स लिग फुटबलमा अर्को कोशेढुंगा पुरा गरे । रोनाल्डोले समूह चरणको सबै खेलमा गोल गर्ने पहिलो खेलाडीको किर्तिमान बनाएका हुन् । यो सिजन समूह चरणका सबै खेलमा गोल गरेका रोनाल्डोको यो ११४ औं च्याम्पियन्स लिग गोल समेत हो ।

खेलको ४३ औं मिनेटमा डर्टमण्डका औबामेयाङले एक गोल फर्काएपछि पहिलो हाफमा रियल २ – १ ले अघि रह्यो । दोस्रो हाफको ४८ औं मिनेटमा औबामेयाङले व्यक्तिगत दोस्रो गोल गरेपछि खेल २ – २ को बराबरीमा पुग्यो । तर, खेलको ८१ औं मिनेटमा भाजक्वेजले गोल गर्दै रियललाई ३ – १ को महत्वपूर्ण जित दिलाए ।

यो जितपछि यसअघि नै अन्तिम १६ मा पुगिसकेको रियल समूह एचको समूह उपविजेता बन्यो । रियलले ६ खेलबाट १३ अंक जोड्यो । यो समूहबाट इन्ग्लिश क्लब टोटनह्याम समूह बिजेता बन्यो ।

बुधबार राति नै एपोइल निकोसियालाई ३–० ले पराजित गरेको टोटनह्यामले  ६ खेलबाट १६ अंक जोड्यो । टोटनह्यामको जितमा सन मिन,लोरेन्ट कोरिएल्नी र एकोउडोउले समान एक एक गोल गरे ।  यो समूहबाट डर्टमण्ड र निकोसिया समूह चरणबाटै बाहिरियो ।