काठमाडौं । देशभर सडक दुर्घटना बढ्न थालेपछि राजमार्ग र सहायक राजमार्गहरूमा ट्राफिक प्रहरीले कडाइका साथ चेकजाँच गर्न थालेको छ । साउन यतामात्र सडक दुर्घटनामा परी ३ सयभन्दा बढीले ज्यान गुमाएका छन् । 

वर्षायाममा धेरै सडक दुर्घटना हुने गरेकाले मुख्य र सहायक राजमार्गमा पनि चेकजाँच कडा पारिएको प्रहरीले जनाएको छ । “सम्बन्धित जिल्ला प्रहरी कार्यालयलाई चेकजाँचमा कडाइ गर्न भनिएको छ,” प्रहरी प्रवक्ता डीआईजी माधव जोशीले भने, “नियमबाहिर गएर चल्ने यातायातलाई नियन्त्रणमा लिन देशैभर पत्राचार गरिएको छ ।” उनका अनुसार सडक डिभिजन कार्यालयको समन्वयमा देशभरका राजमार्गमा ट्राफिक चिन्ह र सुरक्षा सतर्कता चिन्ह राख्ने काम पनि भइरहेको छ । 

मुग्लिनदेखि नारायणगढसम्मको सडक बढी जोखिममा रहेको भन्दै सो क्षेत्रमा ट्राफिक चेकजाँच थप कडा पारिएको डीआईजी जोशीले बताए । त्यस्तै, सडकका संवेदनशील क्षेत्रहरूमा सवारीसाधन ठोक्किँदा सिधै त्रिशूलीमा नखस्ने गरी प्यारामिटर र ग्याभिन बार लगाइने भएको छ ।  

काठमाडौँबाट पोखरातर्फ जाने–आउने सवारीसाधनलाई मुग्लिनमा, पूर्वबाट आउने सवारीसाधनलाई चितवनको भण्डारामा र पूर्व जाने सवारीसाधनलाई गोन्द्राङमा कडाइका साथ चेकजाँच थालिएको प्रहरीले जनाएको छ ।