काठमाडौं । आईसीसी विश्व क्रिकेट लिग च्याम्पियनसिप अन्तर्गत अन्तिम तथा सातौं चरणको पहिलो खेलमा नेपाल पराजित भएको छ । घरेलु टोली युनाइटेड अरब इमिरेट्ससँग नेपाल ७ विकेटले पराजित भएको हो ।
२२२ रनको चुनौति पछ्याउँदै ब्याटिङ गरेको युएईले निर्धारित ओभर सकिन २५ बल बाँकी छदा ३ विकेटको क्षतिमा लक्ष्य पुरा ग¥यो । युएईका लागि घुलाम सबिरले नटआउट नटआउट ८१ रन बनाए । उनले ८ चौका प्रहार गरेका थिए ।
त्यस्तै, युएईका कप्तान रोहन मुस्ताफाले ६२ रन बनाए । उनले ७१ बलको सामना गर्दै ७ चौका र एक छक्का प्रहार गरेका थिए । त्यस्तै, युएईका लागि रमिज शाहजादले ३७ रन बनाए ।
नेपालका लागि सन्दिप लामिछाने र शरद भेषवाकरले समान १–१ विकेट लिए । नेपाली बलरले राम्रो बलिङ गर्न नसक्दा हार ब्यहोर्नु प¥यो । यता, नेपालले फितलो फिल्डिङ गरेको थियो ।
शेख जायद क्रिकेट रंगशालामा टस हारेर पहिले ब्याटिङ गरेको नेपालले पूरै ५० ओभर खेल्दै ६ विकेट गुमाएर २२१ रन बनाएको थियो । नेपालको सम्मानजनक स्कोरको लागि शरद भेषवाकर र उपकप्तान ज्ञानेन्द्र मल्लले अर्धशतक बनाए । क्रिजमा टिकेर खेलेका शरदले अविजित रहँदै ८१ रन बनाए । शरदले ९५ बलको सामना गर्दै पाँच चौका प्रहार गरे । त्यस्तै बसन्त रेग्मी १४ रनमा अविजित रहे ।
त्यस्तै नेपालको लागि उपकप्तान ज्ञानेन्द्र मल्लले ८३ बलमा ६ चौकासहित ५४ रन बनाए । त्यसबाहेक नेपालका कप्तान पारस खड्का र सोमपाल कामीले समान २०–२० रन बनाउँदा ओपनर दिलिप नाथ १६ रन बनाएर पेभेलियन फर्किए ।
यस्तै, नेपालका विनोद भण्डारी ४ तथा आरिफ शेख शून्य रनमा आउट भए । युएईका जाहुर खानले २ तथा अहमेद राजा, मोहमद नाभिद र रोहन मुस्ताफाले समान एक एक विकेट लिए ।
नेपालले घरेलु टोलीविरुद्ध शुक्रबार दोस्रो खेल खेल्नेछ ।