काठमाडौं । पाकिस्तानी आतङ्कवादी समूह तालिबानी बुर्का लगाएर आएका हमलाकारीहरुले आज बिहान पेशावरको एउटा कलेजमा आक्रमण गरेका छन् । 

पाकिस्तानको पेशावर शहरमा रहेको एग्रिकल्चर इन्स्टीटिउटमा शुक्रबार भएको यस गोलीबारीमा परी ९ जनाको मृत्यु भइसकेको छ भने ३६ जना घाइते भएको बताइएको छ । 

पाकिस्तानी सेनाका अनुसार आक्रमणपछि सबै हमलाकारीहरु पनि मृत फेला परेका थिए । पाकिस्तानी तालिबानले हमलाको जिम्मा लिइसकेको छ । त्यस स्थानमा अधिकांश महिला बुर्कामै हिँड्ने भएकाले उनीहरुमाथि कसैले शंका नगरेको बताइएको छ ।

उक्त कलेज अरु बेला विद्यार्थीहरुले भरिभराउ हुने भए पनि इदको छुट्टीका कारण कलेज बन्द गरिएकाले होस्टेलमा बस्नेहरु पनि ईद मनाउन घर गएका थिए । 

त्यसैले चाडपर्वको समयमा यो दुर्घटना घट्दा धेरै विद्यार्थीहरु आक्रमणबाट बचेको बताइएको छ । हमलापछि कलेज भित्रै धमाका सुनिएको प्रत्यक्षदर्शीहरुले बताएका हुन् ।