एजेन्सी । फ्रेन्च लिग लिग वान फुटबलमा पेरीस सेन्ट जर्मेन (पिएसजी) ले ट्रोयसलाई पराजित गरेको छ । बुधबार राति भएको खेलमा शिर्ष स्थानको पिएसजीले ट्रोयसलाई २ – ० ले पराजित गरेको हो ।

घरेलु मैदानमा भएको खेलमा पिएसजीको जितमा नेयमार र एडिनसन काभानीले समान एक एक गोल गरे । काभानीले पेनाल्टीमा गोल गर्न नसकेपछि पिएसजीले पाहुना टोली ट्रोयससँग पहिलो हाफ गोलरहित बराबरी खेलेको थियो ।

खेलको ४१ औं मिनेटमा पाएको पेनाल्टीमा काभानी गोल गर्नबाट चुकेका थिए । तर, दोस्रो हाफमा पिएसजीले नेयमारको गोलबाट सुरुवाती अग्रता बनाएको थियो । खेलको ७३ औं मिनेटमा नेयमारले गोल गर्दै पिएसजीलाई सुरुवाती अग्रता दिलाए । त्यसपछि खेलको ९० औं मिनेटमा काभानीले गोल गर्दै पिएसजीलाई २ – ० को जित दिलाए ।

यो जितसँगै पिएसजीले लिगमा १० अंकको अग्रता कायम राखेको छ । लिग लिडर पिएसजीले १५ खेलबाट ४१ अंक जोडेको छ । पराजित ट्रोयस १८ अंक जोडेर १३ औं स्थानमा छ । दोस्रो स्थानको मार्सेलीको ३१ अंक छ । मार्सेलीले बुधबार राति मेट्जलाई ३ – ० ले हराएको थियो ।

फ्रेन्च लिग अन्तर्गत नै बुधबार राति भएको अन्य खेलमा लियोन लिलीसँग २ – १  ले पराजित हुँदा मोनाको पनि नन्टेससँग १ – ०  ले पराजित भयो । पराजित लियोन र मोनाको समान २९ अंक जोडेर लिगको तेस्रो र चौथो स्थानमा छ ।