काठमाडौं । वाम गठबन्धनका काठमाडौंका उम्मेदवारले आफ्नो चुनावी प्रचारका लागि अधिकांश स्थानमा घरदैलो कार्यक्रम सकाएका छन् ।
पार्टी एकताको उद्घोषसहित चुनावी तालमेलमा रहेका नेकपा एमाले र नेकपा माओवादी केन्द्रले हालसम्म १० वटै निर्वाचन क्षेत्रमा करिब ७० प्रतिशत घरदैलो कार्यक्रम सम्पन्न गरेको एमालेका केन्द्रीय सदस्य एवं जिल्ला इञ्चार्ज सावित्रा भुसालले जानकारी दिए ।
एमाले वरिष्ठ नेता माधवकुमार नेपाल र महासचिव ईश्वर पोखरेल क्रमशः क्षेत्र नं २ र ५ का उम्मेदवारसमेत रहेका कारण उनीहरु र अन्य उम्मेदवार घरदैलो कार्यक्रममा व्यस्त बनेका हुन् ।
प्रतिनिधिसभा सदस्य नर्वाचन क्षेत्र काठमाडौं क्षेत्र नं २ अन्तर्गत नेता नेपाल बुधबार बिहान कोटेश्वरको घरदैलो कार्यक्रममा सहभागी भएका थिए ।
काठमाडौं क्षेत्र नं १ मा गठबन्धनका उम्मेदवार अनिल शर्मा आज अनामनगर र घट्टेकुलोमा प्रचारमा निस्कएका थिए ।
एमाले प्रदेश नं ३ का प्रचार विभाग प्रमुख एवं काठमाडौँ क्षेत्र नं २ प्रदेश क का उम्मेदवार सानुकुमार श्रेष्ठले यही मंसिर १७ सम्म घरदैलो कार्यक्रमलाई जारी राख्ने बताए ।
क्षेत्र नं ३ का उम्मेदवार तथा काठमाडौं जिल्ला कमिटी अध्यक्ष कृष्ण राईले कोठे भेला, बैठक र सभालाई निरन्तरता दिएको जनाउँदै भने, “मतदाताको घरदैलोमा जाने, उनीहरुसँग भेटघाट गर्ने, समस्या बुझ्नेजस्ता कामलाई हामीले तीव्रता दिएका छौँ, यो काम करिब ७० प्रतिशत पूरा भएको छ ।” क्षेत्र नं ४ मा आज बूढानीलकण्ठ नगरपालिकामा कार्यक्रम भएको थियो ।
क्षेत्र नं ६ मा वाम गठबन्धनका उम्मेदवार झक्कु सुवेदी, प्रदेशका उम्मेदवार काठमाडौं महानगरपालिकाका पूर्वप्रमुख केशव स्थापित घरदैलोमा छन् ।
क्षेत्र नं ८ का उम्मेदवार जीवनराम श्रेष्ठ र एमाले उपाध्यक्ष अष्टलक्ष्मी शाक्य विभिन्न भेला, बैठक र घरदैलो कार्यक्रम सहभागी छन् ।
क्षेत्र न ९ प्रदेश नं १ का उम्मेदवार डा अजय क्रान्ति शाक्यले भीमढुंगा, दहचोक, पुरानो नैकाप, स्युचाटारलगायतका स्थानको ६० प्रतिशत चुनावी प्रचार सकिएको जानकारी दिनुभयो । काठमाडौं क्षेत्र नं ९ मा प्रतिनिधिसभामा एमालेका केन्द्रीय सदस्य कृष्णगोपाल श्रेष्ठ र क्षेत्र नं १० मा हीतमान शाक्य उम्मेदवार छन् । रासस
