काठमाडौं । साइपाल एकेडेमी र ओलम्पिया कलेजले प्रथम अल्फा बिटा अन्तरकलेज फुटसल प्रतियोगिताको क्वाटरफाइनलमा स्थान बनाएका छन् । साइपालले समूह ए बाट क्वाटरफाइनलमा स्थान बनाउदा ओलम्पियाले समूह बी बाट क्वाटरफाइनलमा स्थान बनाएको हो ।
शंखमूल फुटसलमा बुधबार भएको खेलमा साइपालले दोहोरो जितसहित क्वाटरफाइनलमा स्थान पक्का गर्यो । साइपालले लिभरपुललाई ४–२ तथा कान्जिरोवालाई ४–० गोलले पराजित गरेको हो । समूह ए कै अर्को खेलमा कान्जिरोवाले युनि ग्लोबलाई ५–२ र लिभरपुलले युनि ग्लोबलाई ३–१ ले पराजित गरेको छ ।
शैक्षिक क्षेत्रमा कार्य गर्दै आइरहेको अल्फा बिटाद्वारा आयोजित प्रतियोगितामा ओलम्पियाले लिटिल एन्जल्स (एलए) लाई ३–१ तथा नामीलाई ४–० गोलले पराजित गर्दै दोहोरो जित निकाल्यो । जितसँगै समूह बी बाट ओलम्पियाले क्वाटरफाइनलमा स्थान बनायो । यस्तै यसै समूहबाट आईडियल कलेजले पनि दोहोरो जित निकालेर क्वाटरफाइनलमा स्थान पक्का गरेका छन् । आईडियलले नामीलाई ४–० तथा एलएलाई ५–० गोलअन्तरले पन्छायो ।
प्रतियोगिताको पहिलो दिन समूह सी को ह्वाइटहाउस कलेजले पनि दोहोरो जित निकालेको छ । दोहोरो जितसहित क्वाटरफाइनलमा स्थान बनाउने क्रममा ह्वाइटहाउसले ह्वाइटफिल्डलाई ४–१ तथा इन्साइड भिजनलाई ४–१ गोलले पाखा लगायो । यस्तै अन्य खेलमा गोल्डेनगेटले युलेन्सलाई ३–१ र इन्साइड भिजनले ब्रिटिस कलेजलाई ३–० ले पराजित गरेका छन् ।
१६ टिम सहभागी प्रतियोगिताको विजेताले १ लाख, उपविजेताले ६० हजार र तेश्रोले ४० हजार नगद पुरस्कार पाउने छन् । सर्वोत्कृष्ट र सर्वा्धिक गोलकर्ता खेलाडीलाई १० हजार नगदबाट पुरस्कृत गरिने छ ।