काठमाडौं । चलचित्र समीक्षक समाजले वि.सं. २०७१, २०७२ र २०७३ सालका क्रिटिक्स अवार्ड वितरण गरेको छ । ०७३ सालको उत्कृष्ट फिल्मको अवार्ड मीन भामको ‘कालोपोथी’ ले प्राप्त गरेको छ ।
‘सेतो सूर्य’ बाट दीपक रौनियारले निर्देशक, ‘कालोपोथी’ बाट मीन भाम र अविनाशविक्रम शाहले पटकथा, ‘सेतो सूर्य’ का लागि डेभिड बार्करले सम्पादन, छायांकनमा ‘कालोपोथी’ का लागि अजिज जम्भाकिभले अवार्ड पाएका छन् ।
उत्कृष्ट अभिनेताको बाजी ‘जात्रा’ बाट विपिन कार्कीले र ‘पुरानो डुंगा’ बाट माओत्से गुरुङले मारेका छन् । ‘लभ सासा’ का लागि केकी अधिकारीले उत्कृष्ट अभिनेत्रीको अवार्ड हात पारेकी छन् ।
२०७२ मा ‘पशुपतिप्रसाद’ ले उत्कृष्ट फिल्मको अवार्ड हात पारेको छ । ‘पशुपतिप्रसाद’ बाट दीपेन्द्र के खनालले निर्देशन र खगेन्द्र लामिछानेले पटकथाको अवार्ड हात पारेका छन् ।
‘कबड्डी कबड्डी’ का लागि शैलेन्द्र डी कार्कीले छायांकारको अवार्ड पाउँदा सम्पादनमा ‘क्लासिक’का सुरेन्द्र पौडेलले बाजी मारेका छन् । अभिनयतर्फ ‘फन्को’ बाट सौगात मल्लले र ‘कबड्डी कबड्डी’का लागि रिस्मा गुरुङले अवार्ड हात पारे ।
समाजले यसअघि घोषणा गरिसकेको २०७१ को अवार्ड पनि वितरण गरेको छ ।
तस्बिरः सरिता खड्का