काठमाडौं । गएको वर्षभन्दा यो वर्षको हस्तकला व्यापार मेलामा बढी आर्थिक बारोबार भएको छ । नेपाल हस्तकला महासंघले अपेक्षा गरेकोभन्दा पनि बढी व्यपार भएको जनाइएको छ ।
नेपाल हस्तकला महासंघका अध्यक्ष धर्मराज शाक्यले मेलामा गएको वर्षभन्दा एक करोड रुपैयाँ बढीको कारोबार भएको बताए ।
“गएको आर्थिक वर्ष सञ्चालन गरिएको मेलामा करिब १४ करोड रुपैयाँको कारोबार भएको थियो,” उनले भने “अहिले १५ औं हस्तकला व्यापार मेलामा १५ करोड रुपैयाँ बढीको कारोबार भएको छ ।”
त्यस्तै महासंघले १० करोड रुपैयाँको मात्रै व्यापार हुने अपेक्षा गरेको थियो । पछिल्लो समय समग्रमा हस्तकलाको व्यापार उकालो लागेकोले सोको प्रभाव मेलामा पनि पर्न गएको उनको भनाइ छ ।
उनको बुझाइमा अहिले नेपालीको खर्च गर्ने क्षमता बढेको छ । सथै स्वदेशी हस्तकलाका उत्पादनहरुमा नेपालीको विश्वास बढ्दै गएको छ ।
काठमाडौंको भृकुटीमण्डपमा शुक्रबारदेखि मंलबारसम्म सञ्चालन भएको उक्त मेलामा अपेक्षा गरिएभन्दा पनि बढी अवलोकनकर्ता आएको बताइएको छ । महासंघका अनुसार एक लाखभन्दा बढी अवलोकनकर्ताले मेलाको अवलोकन गरेका थिए ।
मेलामा १० वटा पेभिलियन, २ सय ओटा स्टल, मुलुकभित्रको २५ ओटा जिल्ला तथा मुलुकबाहिरका छिमेकी देशहरुको समेत सहभागिता थियो ।
काष्ठकला, धातुकला, सुनचाँदी, लगायत वस्तुहरुलाई प्रदर्शनीमा राखिएको मेलामा १३ औं हस्तकला प्रतियोगिता पनि सम्पन्न गरिएको थियो । जसमा विभिन्न विधाका उत्कृष्ट प्रतियोगि तथा महासंघका पूर्व मेला संयोजकहरुलाई सम्मान गरिएको थियो ।
