काठमाडौं । हिमालयन शेर्पा क्लबले प्रथम चन्द्रागिरी गोल्डकपको उपाधि उचालेको छ । मंगलबार सम्पन्न फाइनल खेलमा फ्रेण्डस् क्लबलाई ३–१ ले पराजित गर्दै शेर्पा च्याम्पियन बनेको हो ।
नैकापस्थित चन्द्रागिरी नगरपालिकाको खेल मैदानमा १० खेलाडीमा समेटिएको फ्रेण्डस क्लबलाई अतिरिक्त समयमा ३–१ पराजित गर्दै च्याम्पियन बन्न सफल भएको हो । शेर्पालाई जिताउन विसन गुरुङ, पियुस हेनरी र सेड्रिक ओलावाले गोल गरे । फ्रेण्डस्का लागि लावलले एक गोल गरे ।
खेलमा शुरुवाती अग्रता भने फ्रेण्डसले लिएको थियो । प्रतिस्पर्धात्मक बनेको खेलको पहिलो हाफ भने गोलरहित बराबरीमा सकिएको थियो । ६१ औं मिनेटमा लावलले गोल गर्दै फ्रेन्डस्लाई अग्रता दिलाएका थिए । गोल गरे लगत्तै फ्रेण्डस १० खेलाडीमा समेटिएको थियो । फ्रेण्डसका रुमेश बर्ताैला दोहोरो पहँेलको कार्ड खादै मैदान बाहिरिएपछि फ्रेण्डस दवावमा आएको थियो ।
त्यसपछि लगातार दबाब झेलेको शेर्पाले अन्तिम एक मिनेट शेर्पालाई रोक्न सकेन । शेर्पाका विसन गुरुङले बराबरी गोल फर्काएका थिए । कप्तान मान बहादुर तामाङको पासमा विसनले डिबक्स भित्रबाट गरेको प्रहार फ्रेण्डसका गोलरक्षकले रोक्ने कुनै मौका पाएन । निर्धारित समयमा १–१ गोलको बराबरीमा सकिएपछि खेल अतिरिक्त समयमा धकेलिएको थियो । अतिरिक्त समयको आठौं मिनेटमा शेर्पाले खेलमा अग्रता बनायो । शेर्पाका लागि पियुस हेनरीले गोल गरेका थिए । ११८ औं मिनेटमा अर्का विदेशी खेलाडी सेड्रिक ओलावालेले गोल गर्र्दै शेर्पाको जित पक्का गरे ।
जितसँगै शेर्पाले नगद ५ लाख रुपैया प्राप्त गरेको छ । उपविजेतामा चित्त बुझाएको फ्रेण्डसले २ लाख ५० हजार रुपैयाँ पाएको छ । हिमालयन शेर्पा क्लबका विसन गुरुङ प्रतियोगिताको उत्कृष्ट खेलाडी घोषित भए । फ्रेण्डसका कप्तान धिरज श्रेष्ठ सर्वाधिक गोलकर्ता चुनिए । उनीहरुले समान ३०–३० हजार रुपैया प्राप्त गरे ।
