भारतीय कमेडीका बादशाह मानिने कपिल शर्मा र उनको शोका अर्का चर्चित कलाकार सुनील ग्रोवरबीचको झगडाले भारतीय मिडिया लामो समयसम्म तात्यो । यही विवादका कारण सोनी टिभीको चर्चित शो ‘द कपिल शर्मा शो’ अहिले बन्द छ । आर्थिक रूपमा कमजोर परिवारबाट छोटो समयमै कमेडीमा उदाएका कपिललाई धेरैले ‘बोसो पलाएको’ आरोप लगाए । प्रसिद्धिलाई सन्तुलनमा राख्न नसक्ने, आफूमातहतका कलाकारलाई सम्मान गर्न नजान्ने जस्ता आरोप उनले अहिलेसम्म खेपिरहेका छन् । र, सम्भवतः कपिललाई यो घटनाले जीवनभर पछ्याइरहनेछ ।

‘द कपिल शर्मा शो’मा डक्टर गुलाटी र रिंकु भाभीको भूमिका निभाइरहेका सुनील अस्ट्रेलिया भ्रमणबाट फर्किंदा कपिलले मार्च महिनामा विमानभित्रै दुव्र्यवहार गरेपछि कार्यक्रमबाट बाहिरिएका थिए । कार्यक्रमका अन्य कलाकारहरूसमेत घटनाको विरोधमा उत्रिएका थिए । 

३६ वर्षीय कपिलले सामाजिक सञ्जालबाट सुनीलसँग गल्ती स्वीकार गर्दै माफीसमेत मागेका थिए । तर, उनीहरूको झगडा साम्य भएको छैन । सुनीलसँगको झगडालाई लिएर उनले केही दिनअघि ‘पीटीआई’सँग दुखेसो पोखे । यहाँ उनका कुरा जस्ताका तस्तै राखिएको छः

सुनीलसँगको झगडाले गर्दा अहिले म पछुताइरहेको छु । तर, शायद यो लडाइँ विधाताले लेखिदिएका थिए । त्यो घटनापछि म डिप्रेसनतर्फ धकेलिएँ । म अहिले आफ्ना विगतका दिनहरू फर्किएर हेर्दैछु, जसले मलाई जीवनमा धेरै कुरा सिकाएका छन् ।

यस्ता घटनाहरूले जीवनमा धेरै कुरा सिकाउँछन् । यदि हामी खुशी हुन्छौं भने आफ्नो मर्यादामा पनि बस्न जान्नुपर्छ । यदि तनावमा छौं भने शान्तसँग बस्नुपर्छ, तनाव भुलाउन मदिरा पिउनु हुँदैन । मदिरा पिउँदा समस्या झन् जटिल बन्न सक्छ ।

विगतमा त्यस्ता कैयौं दिन थिए, जब मलाई विदेशमा कुनै कार्यक्रमै गर्न मन लाग्दैनथ्यो तर पनि गर्नु पथ्र्यो । कतिपय अवस्थामा मैले त्यस्ता कार्यक्रमबाट केही पनि कमाउँदिन थिएँ । बरु उल्टै मेरो गोजीबाट खर्च हुन्थ्यो । यस्ता कुरा बुझ्ने व्यापारी होइन म । त्यही विदेशको एउटा कार्यक्रमपछि मेरो जीवनमा अनेक समस्या आइलागे ।

सुनीलसँगको घटनाका बारेमा समाचारहरू आउन थालेपछि म निकै तनावमा थिएँ । म सोच्थें– ती सबै कुरा मेरो वशमा थिएनन् । म यताउता भ्रमण गर्न थालें । म घर पनि जाँदिन थिएँ । होटेलतिर जान्थें, सुटिङ गर्थें अनि विमानबाट अर्कै गन्तव्यतिर लागिहाल्थें । यी सब विवादको बारेमा कसैलाई वर्णन गर्ने फुर्सदसमेत थिएन मसँग ।

सुनीलसँग मेरो जे भयो, त्यसो हुनु हुँदैनथ्यो । तर, कहिलेकाहीँ म सोच्छु– जे हुनु छ, त्यो भएरै छोड्छ । त्यसलाई कसैले रोक्न सक्दैन ।

प्रायः मानिसहरू लेख्छन्– मैले सफलतालाई सम्हालेर राख्न सक्दिनँ । मलाई थाहा छैन, किन यस्तो हुन्छ । मैले यो क्षेत्रमा १५ वर्षदेखि काम गर्दै आइरहेको छु । राष्ट्रिय स्तरको टेलिभिजनमा विगत १० वर्षदेखि आबद्ध छु । जसले मसँग काम गरे, उनीहरूले भन्न सक्छन्– म सफलतालाई सम्हाल्न सक्छु कि सक्दिनँ । यदि साँच्चै मैले सफलता सम्हाल्नका लागि धेरै संघर्ष गर्नु परेको भए शायद उनीहरू मसँग काम गर्दैन थिए । तर, मानिसहरू आफूलाई जे मन लाग्यो, त्यही लेख्छन् । आफूले गरेको कामले नै आफ्नो पक्षमा बोल्छ भन्ने कुरामा म विश्वस्त छु ।

तर, यस्ता विवाद र मुद्दालाई थाँती राखेर म आफ्नो दोस्रो फिल्म ‘फिरंगी’मा लागिरहेको छु अहिले । यो मैले निर्माण गरेको फिल्म हो । फिल्ममा नायक बनेर प्राप्त भएको अनुभवले नै मलाई आज सबैभन्दा शान्त बनाएको छ । अहिले म शान्त भएको छु । जब मैले कार्यक्रमको नेतृत्व गरिरहेको थिएँ, त्यतिबेला कलाकारहरूका थुप्रै गुनासो सुन्थें । त्यतिखेर मैले महिला कलाकारलाई (स्टेजबाहिर) केही भन्दिन थिएँ, खाली पुरुषहरूलाई मात्रै गाली गर्थें । मैले पुरुषहरूका कुरा सुन्दिनथें । त्यही नै मेरो ठूलो समस्या थियो ।

अब त्यस्ता केही समस्या आइपरे भने म आफ्नै मनलाई भन्छु, “शान्त बन र समस्या समाधान गर । यो मेरो समस्या र तनाव हो । मिडियाले पनि मेरै नाम लिनेछन्, किनकि शो मेरै नाममा छ ।”

अब ‘फिरंगी’ प्रदर्शनमा आएपछि पुनः शो शुरु गर्ने या नगर्ने विषयमा राम्रोसँग सोच्नेछु । कार्यक्रम राम्रो हुनुपर्छ र गर्दा रमाइलो पनि हुनु आवश्यक छ । त्यसैले म फेरि स्टेजमै फर्किनेछु । अरु केही गर्नेबारे म सोच्न पनि सक्दिनँ ।