.jpeg)
काठमाडौं । एसीसी यु–१९ एसिया कप क्रिकेट फाइनलमा पुग्ने नेपालको सपना अफगानिस्तानले सपनामै सीमित बनाइदिएको छ ।
नेपाल कुनै पनि प्रतियोगितामा उपाधि नजिक पुग्छ तर सबै बाधक भने अफगानिस्तान हुने गरेको छ ।
शुक्रबार भएको दोस्रो सेमिफाइनलमा अफगानिस्तानसँग ७ विकेटले पराजित हुँदै नेपाल मलेसियामा जारी एसीसी यु–१९ एसिया कप क्रिकेटबाट बाहिरिएको छ ।
पहिलोपटक इतिहास रच्दै सेमिफाइनलसम्म पुगेकोे नेपालको यात्रा अफगानिस्तानले त्यहीँ सीमित बनाईदियो । केही महिनाअघि टेष्ट मान्यता प्राप्त अफगानिस्तान सधैँ नेपालको बाधक बन्ने गरेको छ ।
भारत जस्तो क्रिकेटको पावर हाउस मानिने राष्ट्रलाई पराजित गर्दै सेमिफाइनलसम्मको यात्रा तय गरेको नेपालको सम्भावना टुंगिनुको टर्निङ प्वाइन्ट यस्ता छन् ।
टस हार्नु
किनरारा ओभलमा भएको खेलमा नेपालले टस हार्नु नै हारको मुख्य टर्निङ प्वाइन्ट हो । यदि नेपालले टस जितको खण्डमा बलिङ रोज्ने सम्भावना थियो । अफगानिस्तानले टस जित्दै पहिले बलिङ रोजेपछि नेपाली ब्याट्सम्यानले सुरुमै असजिलो महशुस गरेका थिए ।
नेपालको सबल पक्ष बलिङ हो । तर, अफगानिस्तानविरुद्ध नेपालले जुन रणनीति बनाएको थियो त्यहीअनुसार भने खेल्न सकेन । यसको मुख्य कारण हो, टस हार्नु ।
खराब ब्याटिङ
अफगानिस्तानविरुद्ध नेपालका अनिल कुमार शाहबाहेक अन्य कुनै पनि खेलाडीले राम्रो प्रदर्शन गर्न सकेनन् । नेपाली खेलाडीमा पुनः आईसीसी यु–१९ विश्वकप छनोटमा अफगानिस्तानसँग हार्दाको खेलमा खेलेको जस्तै आत्मविश्वास कम भएको देखिन्थ्यो । दोस्रो ओभरमा २ रन हुँदा नेपालले आफ्नो ओपनर आसिफ शेखलाई शुन्य रनमै गुमाएको थियो ।
सुरुवाती मै पहिलो विकेटको रुपमा शेखलाई गुमाएको नेपालले ९ रन अर्का ओपनर जितेन्द्र शाहलाई १ रनमा गुमायो । चौथो नम्बरमा ब्याटिङ गर्न आएका कप्तान दिपेन्द्रसिंह ऐरीले पनि राम्रो खेल्न सकेनन् । उनी पनि अफगानिस्तानका मुजिव उर रहमानको सिकार बने । त्यतिबेला नेपालको स्कोर ३२ रन हुदा ३ विकेट झरेको थियो । कप्तान दिपेन्द्र ६ रनमा आउट भएसँगै नेपाली टिममा भूकम्प नै पैदा भयो भने अफगानिस्तानको टिममा खुशियाली छाएको थियो । किनभने कप्तान दिपेन्द्रले भारतविरुद्ध ८८ रन बनाएका थिए ।
एकपछि अर्को विकेट पतनको शृंखला नरोकिएपछि नेपाली टिम निकै धरापमा परेको थियो । तर तेस्रो नम्बरमा ब्याटिङ गर्न आएका अनिल कुमार शाह भने क्रिजमा जमिरहेका थिए । अफगानिस्तानले ११.३ ओभरमा ४१ रन हुँदा नेपालका अर्का ब्याट्सम्यानलाई आउट गरे । रोहित कुमार पौडेल ४ रनमा आउट भएका थिए ।
नेपालको गतिलो स्कोर बनाउनका लागि क्रिजमा रहेका अनिल कुमार शाहका लागि राम्रो पार्टनरको आवश्यकता थियो । छैटौ नम्बरमा ब्याटिङ गर्न आएका भिम सार्कीले अनिलसँग ३० रनको पार्टनरसिप खेले । तर भिम सार्की पनि १८.२ ओभरमा ६ रन बनाउदा रन आउट हुन पुगे । त्यतिबेला नेपालको स्कोर ७१ रन रहेको थियो । सातौं नम्बरमा ब्याटिङ गर्न आएका पवन सर्राफ ८ रनमा आउट हुँदा नेपालको स्कोर ८५ रन थियो ।
त्यसपछि भने नेपाली ब्याटिङमा बाढी नै आयो । ३ विकेट गुमाउदा नेपालले १ रन मात्रै बनाउन सक्यो । नेपालका लागि अर्धशतकीय पारी खेलेका अनिल ५० रनमा आउट भए । आठौँ विकेटको रुपमा किशोर महतोलाई शुन्य रनमा गुमाउँदा नेपालको स्कोर ८५ रन नै थियो । २४.१ ओभरमा ८६ रन हुँदा नवौं विकेटको रुपमा कमलसिंह ऐरीलाई गुमाएको नेपालले अन्तिम विकेटका लागि १७ रन बनाएको थियो ।
अन्तिम विकेटको रुपमा सन्दिप लामिछाने ७ रनमा आउट हुँदा नेपालले अफगानिस्तानलाई १०४ रनको सामान्य चुनौती दिएको थियो ।
दुई खेलाडी रोक्न नसक्नु
अफगानिस्तानका दुई खेलाडीलाई रोक्न नसक्दा नेपालले हार ब्यहोर्नुपर्यो । बलिङमा अफगानिस्तानका स्पिनर मुजिब उर रहमान र ब्याटिङमा रमुनुल्लाह गुर्बाजलाई नेपालले रोक्न सकेन ।
नेपाली इनिङ्स ध्वस्तै पार्ने क्रमममा मुजिबले १० ओभर बलिङ गर्दै २ मेडन राख्दै मात्र २८ रन दिएर ६ विकेट लिए । उनले नेपालका ब्याट्सम्यानलाई सस्तैमा पेभेलियन फर्काएका थिए ।
१०४ रनको चुनौति पछ्याउँदै ब्याटिङ गरेका अफगानिस्तानका रमुनुल्लाह गुर्बाजले उत्कृष्ट प्रदर्शन गरे । नेपाली बलरले उनको ब्याटिङलाई रोक्न सकेनन् । उनले मात्र ६५ बलमा २ छक्का र ९ चौकाको मद्दतमा ७१ रन बनाएका थिए । नेपाली बलरले मलेसिया विरुद्ध गरेको स्तरकै बलिङ गरेको भए नमिठो हारबाट नेपाल जोगिन सक्ने थियो ।
एसियन क्रिकेट काउन्सिल (एसीसी) र अन्तर्राष्ट्रिय क्रिकेट काउन्सिल (आईसीसी) ले आयोजना गर्ने प्रायः सबै प्रतियोगितामा नेपालको बाधक अफगानिस्तान हुँदै आएको छ । यो पटक पनि एसीसी यु–१९ एसिया कपमा बदला लिने हेतुले मैदानमा उत्रिएको नेपाली युवा टिम पराजित हुँदै अफगानिस्तानसँगको हारको शृंखला रोक्न सकेन ।
