सबै दैनिक पत्रिकामा निर्वाचनका समाचारलाई नै बढीे महत्त्व दिइँंदै आएको परिप्रेक्ष्यमा नयाँ पत्रिका दैनिकले नेपालका ७ प्रदेशमा कुन कुन दलका को को मुख्यमन्त्री हुनसक्छन्, ककस्को कहाँ कहाँ दाबी छ भन्ने विषयलाई आजको मुख्य समाचार बनाएको छ । 

नयाँ पत्रिकाअनुसार प्रदेश नम्बर १ मा नेपाली कांग्रेसका कुनै ठूला नेता प्रदेशमा उमेदवार छैनन् त्यसैले जिल्ला सभापतिहरू नै मुख्य दाबेदार देखिन्छन् । प्रधानमन्त्री शेरबहादुर देउवाका प्रिय सोलुखुम्बुका सभापति आङगेलु शेर्पा भएको नयाँ पत्रिकाले लेखेको छ । एमालेबाट सुनसरी १ (ख) का उमेदवार एमाले सचिव भीम आचार्य तथा भोजपुर (क) का पूर्वमन्त्री शेरधन राईलाई मुख्यमन्त्रीका दाबेदारका रूपमा नयाँ पत्रिकाले लिएको छ । 

प्रदेश नं २ मा नेपाली कांग्रेसका धेरै नेता महत्त्वाकांक्षी देखिएका छन् । यिनमा पूर्वराष्ट्रपति पुत्र डा. चन्द्रमोहन यादव तथा कोषाध्यक्ष सीतादेवी यादवका छोरा डा. सुभाषचन्द्र यादव रहेका छन् । अन्य प्रतिस्पर्धीमा रञ्जित कर्ण, डा. गणेश मण्डल, प्रेमकिशोर साह तथा रामसरोज यादव देखिन्छन् । एमालेबाट पार्टीका प्रदेश संयोजक सत्यनारायण मण्डल तथा सहसंयोजक नागेन्द्र चौधरीलाई नयाँ पत्रिकाले मुख्यमन्त्रीको प्रत्याशी मानेको छ । 

प्रदेश नं ३ मा नेपाली कांग्रेसका मुख्यमन्त्रीका दाबेदारमा सिन्धुलीका श्याम घिमिरे, मकवानपुरका इन्द्र बानियाँ, चितवनका दिनेश कोइराला, काभ्रेका कञ्चनचन्द्र वादे श्रेष्ठ, काठमाडौंका लोकेश ढकाल, भक्तपुरका गणेशमान चक्रधर र नुवाकोटका जगदीश्वर नरसिंह केसी छन् । एमालेबाट एमालेकी उपाध्यक्ष अष्टलक्ष्मी शाक्यलाई नयाँ पत्रिकाले मुख्य दाबेदार मानेको छ । 

प्रदेश नं ४ मा कृष्णचन्द्र नेपाली (नवलपुर १क), महेन्द्रध्वज जिसी (नवलपुर १ख), तनहुँ १क का गोविन्द  भट्टराई, तनहुँ २क का प्रदीप पौडेल, २ख का ध्रुव वाग्ले तथा कास्की १ क का जीवन परियार छन् । एमालेका भने प्रदेश ४ मा एमाले सचिव पृथ्वी सुब्बा गुरुङ, स्थायी समिति सदस्य किरण गुरुङ रहेका छन् ।

प्रदेश ५ मा नेपाली कांग्रेसका कपिलवस्तु ३ ख का वीरेन्द्रकुमार कनौडिया, दाङ ३ क का डिल्लीबहादुर चौधरी तथा दाङ २ क का कमलकिशोर घिमिरेलाई नयाँ पत्रिकाले मुख्यमन्त्रीको दाबेदार मानेको छ । एमालेबाट भने प्रदेश ५ बाट दाङ २ ख का उमेदवार शंकर पोखरेल प्रमुख दाबेदार तथा परासी २ ख का वैजनाथ चौधरीलाई अर्को उमेदवार मानिएको छ ।

प्रदेश ६ मा नेपाली कांग्रेसका हुम्लाको ख बाट जीवनबहादुर शाही तथा सुर्खेत २ ख बाट तप्तबहादुर विष्टको नाम संभावित मुख्यमन्त्रीमा परेको छ । एमालेबाट प्रदेश ६ मा माओवादीलाई दिने सल्लाह चलेको भए पनि यसका प्रमुख दाबेदार दुई पोलिटब्युरो सदस्य प्रकाश ज्वाला र यामलाल कँडेल देखिएका छन् । 

प्रदेश ७ मा नेपाली कांग्रेसका डडेलधुरा क बाट रघुराज विष्ट, ख बाट कर्णबहादुर मल्ल, डोटी १ क बाट भरतबहादुर खड्का, बाजुरा क बाट जनकराज गिरीलाई मुख्य दाबेदार मानिएको छ । एमालेको भने प्रदेश नंबर ७ बाट बाजुराका कर्णबहादुर थापा एकल संभावना देखिन्छन् ।  

५० वर्ष कम्युनिस्ट सरकार कि देउवा सातपल्ट प्रधानमन्त्री?

पहिलो चरणको निर्वाचन हुन अब केवल ९ दिनमात्र बाँकी छँदा चुनावमा होमिएका राजनीतिक दलका नेताहरू अनेक प्रकारको दाबी गर्दैछन् । यस्ता दाबीमध्ये प्रधानमन्त्री शेरबहादुर देउवाले आफूलाई ज्योतिषले सात पल्टसम्म प्रधानमन्त्री बन्छ भनेर गरेको भाषणले महत्त्व पाएको छ । ७२ वर्षीय शेर बहादुर देउवा अहिलेसम्म चार पल्ट प्रधानमन्त्री भइसकेका छन् । देउवाले आफ्नो बारेमा ज्योतिषले गरेको भविष्यवाणी सुनाउनुको मुख्य उद्देश्य नेकपा (एमाले)का अध्यक्ष केपी शर्मा ओलीलाई उत्तर दिनु रहेको देखिन्छ । एउटा कार्यक्रममा ओलीले शेरबहादुर देउवा नेपाली कांग्रेसको अन्तिम प्रधानमन्त्री हुने ठोकुवा गरेका थिए । उता देउवाले भने यो पल्ट कम्युनिस्ट गठबन्धनबाट नेपाली कांग्रेसलाई केही फरक नपर्ने र कांग्रेसले सोचेभन्दा राम्रो नतिजा ल्याउने दाबी गरेका छन् । 

कान्तिपुरले शेरबहादुर देउवाको भाषणलाई मुख्य समाचार बनाएको छ भने नागरिक दैनिकले सबै ‘सबै नेताका आआफ्नै डम्फु’ शीर्षकमा केपी शर्मा ओली, पुष्पकमल दाहाल ‘प्रचण्ड’ तथा शेरबहादुर देउवाको भनाइ राखेको छ । नागरिकका अनुसार दाहालले देशमा ५० वर्षसम्म कम्युनिस्टको सरकार रहने दाबी गरेका छन् भने ओलीले कम्युुनिस्ट सरकार आएको खण्डमा देशमा स्थिरता आउने घोषणा गरेका छन् । उता देउवाले भने जनताले फेरि आफूलाई जिताएको खण्डमा पुनः प्रधानमन्त्री हुने विश्वास दिलाएका छन् ।

गोरखापत्रले कांग्रेसको समाचारलाई ६ कोलममा र कम्युनिस्ट गठबन्धनको समाचारलाई दुई कोलममा प्रकाशित गरेको छ । प्रधानमन्त्री देउवालाई उद्धृत गर्दै ’जनताले लोकतन्त्र नै रोज्छन्’ भन्ने सरकारको मुखपत्रको एउटा शीर्षक छ भने वाम गठबन्धनको बहुमत निश्चित हुने अर्को शीर्षक छ । 

सम्पादकीय

आजका नागरिक तथा कान्तिपुरले देशमा उध्रिन नसकेको बलियो भ्रष्टाचारको जालोका सन्दर्भमा सम्पादकीय लेखेका छन् । नागरिकले ट्रान्सपेरेन्सी इन्टरनेसनलले नेपाललाई दक्षिण एसियाको सबैभन्दा भ्रष्ट मुलुक भनेर घोषणा गरेका गत वर्ष माघको रिपोर्टबाट सम्पादकीयको प्रारम्भ गरेको छ । कर्मचारीतन्त्र सबैभन्दा भ्रष्ट भएको र त्यसको प्रमाणको रुपमा बुधबार अख्तियारले पक्राउ गरेको वैदेशिक रोजगार विभागका महाप्रबन्धकको उदाहरण नागरिकले दिएको छ । कान्तिपुरले पनि यही उदाहरण लिँदै वैदेशिक रोजगारीमा व्याप्त भएको भ्रष्टाचारको समस्यालाई उजगार गरेको छ । 

अन्नपूर्ण पोस्टले नेताको माला मोहको विषयमा सम्पादकीय लेख्दै यसलाई सकभर सभ्य ढंगले प्रस्तुत हुन सल्लाह दिएको छ । राजधानीले निर्वाचन सुरक्षाको विषयमा सम्पादकीय लेख्दै नागरिकप्रति उत्तरदायी बन्न आह्वान गरेको छ भने नयँ पत्रिकाले अनिवार्य शिक्षामा देखिएको चुनौतीलाई उठाएको छ । त्यस्तै गोरखापत्रले काठमाडौंमा आयोजित दक्षिण एसियाली आर्थिक सम्मेलनको सन्दर्भमा यो क्षेत्रमा आर्थिक सहकार्य न्यून भएको विषयमा चिन्ता प्रकट गरेको छ ।