ad

साहित्य र कला

विपिन उत्कृष्ट नायक, ‘कालोपोथी’ उत्कृष्ट फिल्म 

काठमाडौं । चलचित्र समीक्षक समाजले वि.सं. २०७२ र २०७३  सालका क्रिटिक्स अवार्डका विजेता घोषणा गरेको छ । समाजले मंगलबार विज्ञप्ति जारी गर्दै विजेता घोषणा गरेको हो । २०७३ सालको उत्कृष्ट फिल्मको अवार्ड मीन भामको ‘कालोपोथी’ ले प्राप्त गरेको छ । 

‘सेतो सूर्य’ बाट दीपक रौनियारले निर्देशक, ‘कालोपोथी’ बाट  मीन भाम र अविनाशविक्रम शाहले पटकथा, ‘सेतो सूर्य’ का लागि डेभिड बार्करले सम्पादन, छायांकनमा ‘कालोपोथी’ का लागि अजिज जम्भाकिभले अवार्ड पाएका छन् । 

उत्कृष्ट अभिनेताको बाजी ‘जात्रा’ बाट विपिन कार्कीले र ‘पुरानो डुंगा’ बाट माओत्से गुरुङले मारेका छन् । ‘लभ सासा’का लागि केकी अधिकारीले अभिनेत्रीको अवार्ड हात पारेकी छन् । 
समाजले २०७२ को अवार्ड पनि घोषणा गरेको छ । २०७२ मा ‘पशुपतिप्रसाद’ उत्कृष्ट फिल्म घोषित भएको विज्ञीतीमा उल्लेख छ । ‘पशुपतिप्रसाद’बाट दीपेन्द्र के खनालले निर्देशन र खगेन्द्र लामिछानेले पटकथाको अवार्ड हात पारेका छन् । 

‘कबड्डी कबड्डी’का लागि शैलेन्द्र डी कार्कीले छायांकारको अवार्ड पाउँदा सम्पादनमा ‘क्लासिक’का सुरेन्द्र पौडेलले बाजी मारेका छन् । 

अभिनयतर्फ ‘फन्को’ बाट सौगात मल्लले र ‘कबड्डी कबड्डी’का लागि रिस्मा गुरुङले अवार्ड हात पारेका छन् । 

समाजले यसअघि घोषणा गरिसकेको २०७१ को समेत गरी तीनै वर्षका अवार्ड मंसिर ६ गते राजधानीमा वितरण गर्ने जनाएको छ । 

२०७१ मा ‘कबड्डी’ ले फिल्म, ‘टलकजंग भर्सेज टुल्के’का लागि निश्चल बस्नेतले निर्देशक, ‘कबड्डी’का लागि रामबाबु गुरुङ र उपेन्द्र सुब्बाले पटकथा, ‘तान्डव’का लागि बनिस शाह र मिलन श्रेष्ठले सम्पादन तथा ‘सुन्तली’का लागि ओन्ड्रा बेलिकाले पुरस्कार पाएका थिए । यस वर्षका लागि ‘कबड्डी’का दयाहाङ राई उत्कृष्ट अभिनेता तथा ‘सुन्तली’का लागि प्रियंका कार्की उत्कृष्ट अभिनेत्री घोषित भएका थिए ।
 

तपाईंको मत