बलियो प्रतिस्पर्धीलाई परास्त गरेर हासिल भएको सफलताले दुई गुना बढी खुसी दिन्छ । नेपालका युवा क्रिकेट खेलाडीले यु–१९ एसिया कपको प्रतिस्पर्धामा भारतीय युवा टोलीलाई परास्त गरेको समाचारले नेपालका क्रिकेट प्रेमीमात्र हैन थाहा पाउने सबै नेपालीलाई हर्षित र गौरवान्वित बनाएको छ । यसैले हामी नेपाली युवा टोलीका खेलाडी, प्रशिक्षक र खेल जगतलाई बधाई दिन्छौँ । मलेसियामा भइरहेको खेलमा साबिक विजेता भारतविरुद्ध नेपाली टोलीले १९ रनको अन्तरमा आइतवार विजय हासिल गरेको हो । त्यसो त नेपालले यसअघि बंगलादेश, पाकिस्तान, न्युनिल्यान्ड, दक्षिण अफ्रिकाजस्ता नाम चलेका टिमहरूलाई हराएको भए पनि भारतलाई हराउन सकेको थिएन । यसपटक टेस्ट स्तरको भारतीय युवा टिमलाई पहिलो पटक हराएकाले नेपालीको खुसी दोब्बर भएको हो ।
नेपाली टिमले जितेकोमा खुसी हुनु जति स्वाभाविक हुन्छ भारतलाई हराउन सक्ता त्यस्तो हर्ष दोब्बर हुनु पनि उत्तिकै स्वाभाविक देखिन्छ । एउटा सामान्य खेल स्पर्धाको समाचार भए पनि नेपालमा छापा, टेलिभिजन र अनलाइन सञ्चार माध्यममा दिइएको प्राथमिकताले यसको महत्त्व स्पष्ट भएको छ । यस विजयले नेपाली खेल जगत्को भविष्य उज्यालो हुनसक्ने संकेत पनि गरेको छ । सामान्यतः नेपालीहरू वैयक्तिक स्पर्धा हुने खेलमा कशुल तर समूहगत खेलमा कमजोर हुन्छन् भन्ने धारणालाई पनि यस विजयले चुनौती दिएको छ । नेतृत्व र वातावरण अनुकूल भएमा नेपालीले खेल क्षेत्रमा पनि असाधारण क्षमता देखाउन सक्ता रहेछन् । विजयी टिमका प्रशिक्षक, कप्तान र युवा खेलाडी सबै यसका उदाहरण हुन् ।
देशमा लामो समयसम्म नेपाल क्रिकेट संघमा विवाद भइरहँदासमेत खेलाडीले उत्तम कौशल प्रदर्शन गर्नु निश्चय पनि प्रेरक प्रसंग हो । यी युवा खेलाडीको विजयले क्रिकेट संघमा पदको विवादमा अलमलिएकाहरूलाई भने आत्मग्लानि भयो कि भएन होला ? उनीहरूले व्यक्तिगत स्वार्थ छाडेर संघलाई माफिया शैलीमा कब्जा गर्न खोज्नुको साँटो खेल र खेलाडीको विकासमा सबै ध्यान केन्द्रित गरेका भए यी प्रतिभाशाली युवाबाट धेरै अपेक्षा गर्न सकिने रहेछ । नेपालका अधिकांश खेल संगठनमात्र हैन राष्ट्रिय खुलकुद परिषद् र नेपाल ओलम्पिक कमिटीसमेत विवादको घेरामा परेका छन् । विडम्बना, कुनै पनि विवाद खेलको विकासका लागि भएको देखिँदैन ।
खेलकुद क्षेत्रमा प्राप्त हुने पैसा र प्रतिष्ठा दुरुपयोग गर्न संस्था कब्जा गर्ने नियतले मात्र यस्ता विवादहरू उब्जाइएको स्पष्टै देखिन्छ । यसैले देशभित्र अपार सम्भावना भए पनि राजनीतिक नेतृत्वको कमजोरी र बदनियतका कारण जनताका पक्षमा सदुपयोग हुन नसकेजस्तै खेलकुदका क्षेत्रमा पनि प्रतिभा हुँदाहुँदै आवश्यक प्रोत्साहन र उपलब्ध साधनस्रोतको सही व्यवस्थापनको अभावले नेपालको खेलका क्षेत्रमा पनि अपेक्षाकृत पछाडि परेको हो । युवा क्रिकेटरहरूले जस्तै अरू खेलाडीले पनि नेपालको गौरव बढाउन् भन्ने चाहने हो भने खेलका लागि उपलब्ध साधनस्रोत खेलाडीको संरक्षण र विकासमै खर्च हुने वातावरण निर्माण गर्नुपर्छ । खेलाडीको मुख मोसेर पदाधिकारी र कर्मचारीलार्इ पाेस्ने अहिलेको प्रवृत्ति समाप्त हाेस् । कम्तीमा विजयी टिम नेपाललार्इ प्रोत्साहनको तत्काल घोषणा हुनुपर्छ ।
निराश र हतास नेपाली जनमानसलाई यति खुसी दिएकोमा कप्तान र प्रशिक्षकसहित टिम नेपाललाई हार्दिक बधाई र शुभकामना !