काठमाडौं । मलेसियामा जारी एसीसी यु–१९ एसिया कप क्रिकेट प्रतियोगिताको दोस्रो खेलमा नेपालले अहिले भारतसँग प्रतिस्पर्धा गरिरहेको छ । मलेसियाको बायुमस ओभलमा नेपालले तीन पटकको बिजेता भारतको सामना गरिरहेको हो । 

भारतविरुद्ध टस हारेर पहिले ब्याटिङ गरिरहेको नेपालले मध्यम प्रदर्शन गरिरहेको छ । 

नेपालले ३५   ओभरको समाप्तिमा एक सय रनको आँकडा पुरा गरेको छ । ३५  ओभरको खेल सकिँदा नेपालले ४  विकेट गुमाएर १०६ रन बनाएर खेलिरहेको छ ।

त्यस्तै नेपालका कप्तान दिपेन्द्र सिंह एरीले अर्धशतक समेत पुरा गरेका छन् । क्रिजमा रहेका दिपेन्द्रले ७१ बलमा २ चौका र १ छक्का प्रहार गर्दै अर्धशतक बनाएका हुन् । उनलाई भिम सार्कीले साथ दिइरहेका छन् । 

यसअघि नेपालका जितेन्द्र मुखिया ३६, अनिल कुमार साह ६, रोहित कुमार पौडेल ६ तथा आसिफ शेख मात्र ३ रन बनाएर पेभेलियन फर्किए । भारतको आदित्य थाक्रेले २ तथा अबिषेक शर्माले १ विकेट लिए ।

आइतबार भएको पहिलो खेलमा बंगलादेशसँग डकवर्थ (डिएल) पद्दतिको आधारमा २ विकेटले पराजित नेपाललाई दोस्रो चरणमा पुग्न आजको खेल जित्नैपर्ने दबाबमा रहेको छ ।
पहिलो खेलमा नेपाल अन्तिम ओभरमा चुक्दा बंगलादेशसँग पराजित भएको थियो ।

कठिन मानिएको समूह समूह ‘ए’ मा रहेको नेपालले भारतपछि अन्तिम खेलमा मलेसियासँग खेल्नेछ । 

नेपाल र मलेसियाबिचको खेल मंगलबार हुने छ । समूहको विजेता र उपविजेताले सेमिफाइनलमा स्थान बनाउनेछन् । समूह बी मा श्रीलंका, अफगानिस्तान, युएई र पाकिस्तान रहेका छन् ।
तस्बिरः एसीसी