एजेन्सी । स्पेनिस क्लब रियल मड्रिडका कप्तान सर्जियो रामोसले पिएसजीका स्टार नेयमार रियल आए आफूहरु स्वागत गर्न तयार रहेको बताएका छन् । पछिल्लो समय नेयमार रियल आउने हल्ला चलिरहेको बेला कप्तान रामोसको यस्तो भनाइ आएको हो ।
स्पेनिस रेडियो कार्यक्रमसँगको कुराकानीमा रामोसले नेयमार क्लबमा आउन चाहे क्लबको ढोका सधै खुल्ला रहने बताएका हुन् । एल लार्गुरो नामक रेडियो कार्यक्रममा रामोसले भनेका छन् , “मलाई सधै सबैभन्दा राम्रो खेलाडीहरू मनपर्छ र नेयमार तिनीहरूमध्येको एक हुनुहुन्छ।”
यस्तै रामोसले यसअघि नेयमारलाई बार्सिलोनाबाट रियल मड्रिड आउन कठिन भएको उल्लेख गर्दै पीएसजी रोजेको बताए । उनले भने, “शायद नेयमारले सोचे बार्सिलोनाबाट सिधै रियल मड्रिड जानु कठिन कार्य हो, त्यसैले उनले पीएसजी माध्यम बनाए । मलाई आशा छ उनले फुटबल बुझेका छन् । यदि उ डिसेम्बरमा क्लब आउन चाहन्छु भने ढोका खुल्ला रहन्छ ।”
पछिल्लो समय रियल मड्रिडमा पोर्चुगिज स्टार स्ट्राइकर रोनाल्डोको प्रभाव कम हुँदै गएपछि क्लबले उनको स्थानमा नेयमार भित्र्याउने योजना बनाएको हो । रियल मड्रिडसँग रोनाल्डोको सम्झौता सन् २०२१ सम्म रहेको छ । रोनाल्डोको सम्झौता सकिएपछि रियलले नेयमारलाई रोनाल्डोको विकल्पको रुपमा हेरेको हो ।
यस्तै विश्वको सर्वाधिक महंगा खेलाडी नेयमारले पनि फ्रान्समा एक उपाधि जितेर पुन स्पेन फर्कने चाहना राख्दै आएका छन् । नेयमार बार्सिलोनबाट यो सिजन कीर्तिमानी मूल्य १८९ मिलियन पाउण्डमा पिएसजी आएका हुन् । नेयमारले पिएसजीसँग पाँच वर्षको सम्झौता गरेका थिए । उनले पिएसजीबाट यो सिजन १२ खेल खेल्दै ११ गोल गरिसकेका छन् ।
नेयमारलाई क्लबमा भित्र्याउन रियल मड्रिडका अध्यक्ष फ्लोरेन्टिनो परेजले नेयमारका बुबा नेयमार सिनियरसँग समेत भेट गरेका थिए । अध्यक्ष परेजले नेयमारका बुबासँग उनी क्लब आउन चाहे क्लबले सधै ढोका खुल्ला राख्ने बताएका थिए । यसअघि रियलले सन् २०१३ मा समेत नेयमार भित्र्याउन खोजेको थियो । तर, ब्राजिलियन स्टार नेयमारले बार्सिलोना रोजेका थिए ।
यस्तै रियलका कप्तान रामोसले पछिल्लो समय स्टार स्ट्राइकर क्रिस्टियानो रोनाल्डोले देखाउँदै आएको हर्कत उतम नरहेको बताएका छन् । गत सिजन क्लबलाई च्याम्पियन्स लिग जिताउन महत्वपूर्ण भूमिका खेलेका रोनाल्डोले यो सिजन भने जम्न सकेको छैन । यो सिजन रोनाल्डोले ला लिगामा मात्र एक गोल गर्न सकेका छन् ।
रेडियो कार्यक्रममा रोनाल्डोबारे सोधिएको प्रश्नमा रामोसले भने, “रोनाल्डो धेरै महत्वकाक्षी बन्दै आएका छन् जसको करण उनी गोल गर्न असफल भइरहेका छन् । सायद यो उतम हैन ।” तर, रामोसले क्लबको लागि रोनाल्डोले धेरै दिएको र उनलाई गोल्डेन बुट, बालोन डी ओर उपाधि जित्नको लागि गोल चाहिने बताउँदै रोनाल्डोलाई दोष दिन नहुने बताए । यस्तै रामोसले क्लबको लागि रोनाल्डो, इस्को वा गोल किपर जसले गोल गरेपनि आफूलाई प्रवाह नहुने बताए ।