१५ वर्ष अगाडि दर्जनौं हिरोको अफरलाई लत्याएका प्रशान्त ताम्राकार अहिले भिलेनको बाटो हुँदै नेपाली रजतपटमा छिरेका छन् । चलचित्र ‘ऐश्वर्य’ मा भिलेनका रुपमा देखिएका उनले यति बेला उक्त चलचित्रका नायक रमेश उप्रेतीलाई समेत चर्चाका हिसावले पछि पारिदिएका छन् । ट्रेलरमा देखिएका उनलाई त्यही छोटो लुक्स र अभिनयकै कारण बलिउडबाट समेत अफर आएको उनी घुमाउरो शब्दमा स्वीकार्छन् । उनै प्रशान्त ताम्राकारसँग गरिएको कुराकानीः
कत्तिको ब्यस्त हुनुहुन्छ ?
चलचित्र रिलिज हुनै लागेकाले व्यस्त छु । ममात्रै होइन, ‘ऐश्वर्य’को पुरै टिम नै व्यस्त छ । जतिसक्दो धेरै दर्शकलाई ‘ऐश्वर्य’ यही कात्तिक ९ गतेदेखि अल नेपाल रिलिज हुँदैछ भन्ने जानकारी दिनु छ । यसकै लागि हामी दौडधुपमा छौं ।
टिजर, ट्रेलर र गीतको रेस्पोन्स कस्तो आइरहेको छ ?
टिजरबाट सोचेको भन्दा फरक रेस्पोन्स पायौँ । गीत र ट्रेलरसम्म आइपुग्दा ‘अमेजिङ’ रेस्पोन्स पाइरहेका छौँ । सबै जना पर्खाइको अवस्थामा नै रहेको पाएका छौँ । सकारात्मक प्रतिक्रिया आइरहेको छ । सञ्चारमाध्यमले सहयोग गरेकाले धेरैभन्दा धेरै दर्शकसम्म पुग्ने अवसर पाएका छौँ ।
भिलेनको नै चरित्र निभाउनुको कारण ?
म कलाकारको रुपमा चलचित्र खेल्न चहान्छु । म पपुलर हुनका लागि, हिरो हुनका लागि र पैसा कमाउनका लागि चलचित्र उद्योगमा प्रवेश गरेको होइन । म २५ वर्ष देखि फेसन विजनेसमा छु, त्यसैले पैसा कमाउन म यो क्षेत्रमा आएको होइन । मेरा लागि यो चलचित्र च्यालेन्ज पनि हो । यसअघि मैले अभिनय गरेका ‘मुखौटा र ‘सम्बोधन’ रिलिज भए पनि ती चलचित्र कमर्सियल फिल्म थिएनन् । यो मेरो कमर्सियल डेब्यू मुभी पनि हो । ट्रेलर रिलिज भएपछि मलाई सञ्चारमाध्यमले जसरी खोजिरहेका छन्, बेग्लै किसिमको अनुभूती भैरहेको छ । यो मेरा लागि सकारात्मक पक्ष पनि हो ।
चलचित्रमा मुख्य पात्र हिरो/हिरोइन नै हो । तर जसरी मलाई दिइएको जिम्मेवारी निभाउँदा रेस्पोन्स पाएँ त्याे मैले अपेक्षा गरेभन्दा धेरै फरक हो । नयाँ फेसले कस्तो काम गरिरहेको छ भन्ने प्रतिक्षा पनि भैरहेको छ । मेरो काम दर्शक माझ नजिकिनु पनि हो । अहिले दर्शकले यो को हो भनेर खोजिरहनु भएको छ । चलचित्र हेरिसकेपछि कस्तो प्रतिक्रिया आउँछ त्यसको पर्खाइमा छु ।
सुरुमा चलचित्रमा नायक हुने रहर थियो कि भिलने नै तपाइँको सपना हो ?
१५ वर्ष अगाडि मलाई हिरोका लागि अफर आएको थियो । त्यती बेला मैल चलचित्र क्षेत्रलाई भन्दा पनि फेसनमा नै आफूलाई केन्द्रित गरेँ । जब खेलौं भन्ने लाग्यो उमेर गैसकेको थियो । नयाँ पुस्ता आइसकेको थियो । टिनएजरहरुको समय थियो । हाम्रो अनुहारलाई कसले स्वीकार्ला भन्ने लाग्यो ।
कलाकारिताका लागि उमेर हुँदैन । लुक्सवाइज हिरो नभए पनि पपुलर हुने कयौं कलाकार छन् । त्यही सोचमा थिएँ, भोली मलाई हेरेर कसैले खोज्ला कि भन्ने पर्खाइमा थिएँ ।
‘ऐश्वर्य’ को कुरा भएपछि मलाई रमेश उप्रेती र निर्देशक दिवाकर भट्टराईले खोज्नु भयो । उहाँहरुले अफर गरेपछि यसमा आबद्ध भएँ ।
तपाईँसम्म उहाँहरु कसरी आइपुग्नुभयो ?
उहाँहरुको स्क्रिप्टले मलाई माग्यो । उहाँहरुले सुरुमै मलाई भन्नुभयो,–यो क्यारेक्टर तपाइँले गर्नुपर्छ । तपाइँको विकल्प नै छैन । तपाइँले नगर्ने हो भने यो चलचित्र नै बन्दैन । उहाँहरुले मलाई विश्वास गरेर यसो भनेपछि मसँग हुन्छ भन्नुको विकल्प नै भएन । त्यसैले ‘ओके’ गरेँ । सुरुमा म यो जिम्मेवारी निभाउन सक्छु भन्नेमा आत्मविश्वास नै थिएन । के यो चरित्र मैले निभाउन सक्छु भनेर सोधेको थिएँ । उहाँहरुले मेरो प्रश्न खस्न नपाउँदै "सक्नुहुन्छ" भन्नुभयो । उहाँहरुले सक्नुहुन्छ भनेपछि आत्मविश्वास आयो र गरेँ । हरेक कलाकारले सोच्ने पात्र हो राघव (ऐश्वर्यको भिलेन) । यो अवसर पाएकोमा म खुसी छु ।
भिलेनभन्दा पनि हिरो नै ठिक हुन्छ भन्ने लागेको थिएन ?
लागेन । मलाई पपुलर हुनु थिएन । हिरो हुनु भनेको पपुलर हुनलाई हो, हिरोइजम देखाउन हो । म खेल क्षेत्रमा थिएँ । त्यहाँ मलाई खेलसँग मतलब थियो । मैले बास्केटबल खेलेँ, ह्यान्डबल खेलेँ, स्क्वास खेलेँ, सफ्ट टेनिस खेलेँ । नेसनल गेम खेलेको छु । त्यहाँ मलाई पपुलर हुनुपर्छ भन्दा पनि राम्रो खेल खेल्नुपर्छ भन्ने लाग्यो । मोडल, कोरियोग्राफी, म्यानेजमेन्ट पनि मैले व्यवसायिक रुपमा गरेँ । अहिले म चलचित्र क्षेत्रमा आइपुगेको छु । यो रमाइलो गर्ने क्षेत्र हैन । यहाँ पनि व्यवसायिक रुपमा काम गर्नुपर्छ भनेर त्यही अनुसारको मेहनत गरेको छु ।
तर कतिपय त चलचित्र उद्योगमा रमाइलोका लागि मात्रै पनि छिरिरहेका छन् नि हैन ?
त्यो पनि हो । तर, सबै मान्छे एकै प्रकारका हुँदैनन् । मेरो सोचमा जहाँ काम गर्छु त्यहाँ राम्रो काम गरौं भन्ने हो । मैले काम सुरु गरेको यो चलचित्र उद्योगमा आफ्नो पूरै जीवन दिने मान्छेहरु छन् । उहाँहरुको सम्मानका लागि पनि मैले राम्रो काम गर्नुपर्छ । सके मैले यो उद्योगको विकासका लागि एउटा भएपनि इटा थप्नुपर्छ नसके यसलाई बदनाम गराउने वा भत्काउने अधिकार पनि मलाई छैन ।
भिलेन भन्ने वित्तिकै डर लग्दो अनुहार दिमागमा आउँछ नि ! तर तपाइँको हकमा त यो लागु हुँदैन नि !
कुनै समय तपाइँले भनेजस्तै थियो अवस्था । भिलेन भन्न वित्तिकै हिरोइन डराएर चिच्याउनु पर्यो । हिरोले उसलाई बचाउन भिलेनलाई कुट्नु पर्यो । त्यसपछि वाहीवाही हुन्छ दर्शकले ताली बजाउँछ, त्यो खालको समय थियो । तर समयसँगै परिवर्तन हुन थाल्यो । भिलेन भनेको डरलाग्दो अनुहारकै हुनुपर्छ भन्ने छैन । दर्शकको सोच फरक भैसक्यो । हामी आफैं भिलेन हौँ र आफैँ हिरो पनि हौँ । व्यक्ति विशेष नराम्रो हुँदैन । मैले जुन चरित्र निभाएको छु राघवको ऊ आफैँमा खराव हैन । भिलेन भनेर संज्ञा दिइयो म अहिले चुप लागेर बसिरहेको छु । तर चलचित्र हेरिसकेपछि मलाई हेर्ने दृष्टिकोण फरक हुनसक्छ ।
‘ऐश्वर्य’ को हिरो भन्दा पनि भिलेन बढी ‘पपुलर’ भैरहेको छ । कस्तो लागिरहेको छ ?
यो ‘टिमवर्क’ हो । मैले एक्लै गरेको काम हैन । मैले न्याय गर्नसक्छु भनेर मलाई निर्माण पक्षले विश्वास गरेर ‘राघव’को पात्र दियो, त्यो नै ठूलो कुरा हो । मैले उहाँहरुको विश्वास अनुसार सतप्रतिशत काम गर्ने प्रयत्न गरेको छु । पक्कै पनि आफ्नो कामको प्रशंसा हुँदा खुसी लाग्छ नै । समग्रमा भन्दा ‘टिमवर्क’ हिट भएको हो । ‘ऐश्वर्य’ हिट भएको हो । जुन कुरा हामीले खाजेका थियौँ, त्यो पूरा भए जस्तो लाग्छ । भिलेन दाजुको नाम के हो ?, भिलेन दाजुको नाम जान्न पाए हुनेथियो भन्ने कमेन्ट आउँदा खुसी लाग्छ । ‘राघव’ पात्रलाई दिमागमा राख्नु भएको छ, म खुसी छु । अब चलचित्र हेरीसकेपछि कस्तो प्रतिक्रिया आउँछ, त्यसको पर्खाइमा छु ।
गीत र ट्रेलर हिट भएका चलचित्र फ्लप भएका उदाहरण धेरै छन् नि !
हो त्यस्तो पनि नदेखिएको हैन । तर म आत्मविश्वासका साथ भन्न सक्छु चलचित्र राम्रो बनेको छ । हिजो हामीले चलचित्रसँगै बसेर हेर्यौ । चलचित्रको कथा, अभिनय, कोरियोग्राफी, ब्याग्राउन्ड स्कोर निकै राम्रो छ । हामी एकले अर्कोको अभिनय हेरेर तारिफ गरेका छौँ । ‘अमेजिङ’ वर्क स्क्रिनमा देखिन्छ । नेपाली चलचित्र हेर्ने दशर्कलाई चलचित्र मनपर्छ ।
आगामी चलचित्रमा यहाँलाई भिलेनका रुपमा बढी देख्न पाइन्छ कि हिरोका रुपमा ?
भिलेन हिरो भन्दा पनि कलाकार हुनुपर्छ भन्ने मेरो मान्यता छ । इमान्दारिताका साथ भन्दा म कलाकारका रुपमा चिनिन चाहान्छु ।
कलाकारको पनि चरित्र त हुन्छ नि !
हिरो भिलेन भन्दा पनि कलकार चाँडै मर्दैन भन्ने हो । हिरो बन्यो भने उसको आयू कम हुन्छ तर उसको जिम्मेवारी बढी हुन्छ । १० वटा चलचित्र हिट भए पनि एउटा चलचित्र फ्लप भयो भने त्यो हिरो हिरो रहँदैन । हिरो क्यारेक्टरमा आएर पनि काम गर्न सक्तैन ।
भनेपछि भिलेन नै यहाँको रोजाइ हो ?
म भिलेनको रुपमा पनि आउन सक्छु । पोजेटिभ क्यारेक्टरमा पनि आउन सक्छु । तर चरित्र राम्रो हुनुपर्यो । छोटो रोलमा पनि म खेल्छु, लामो रोल नै चाहिन्छ भन्ने होइन तर त्यो छोटो रोलले पनि अर्थ बोक्नुपर्छ । यति भन्छु म सोचेर नै यो क्षेत्रमा आएको छु ।
अहिले कत्तिको अफर आइरहेको छ ?
अफर त १४/१५ वटा बाट पनि आए । तर मलाई हेरेर ४/५ वटा स्क्रिप्ट तयार भैरहेको छ । भर्खर प्रवेश गरेको कलाकारलाई लिएर स्क्रिप्टिङ भैरहेको छ भने त्यो नै ठूलो कुरा हो ।
नेपाली कलाकारहरु बलिउडमा पनि जान थालेका छन् । तपाइँको सम्भावना के छ ?
म मनिषा कोइराला, सुनिल थापाको ठूलो फ्यान हुँ, जसले बलिउडमा गएर निकै राम्रो काम गर्नु भएको छ । केही वर्ष होम ग्राउन्डमा बसेर राम्रो काम देखाएर म पनि जान सक्छु । अहिले यति नै भन्छु । हुनसक्छ बलिउड या हलिउडबाट मलाई पनि अफर आएको होस् ।