काठमाडौं । सार्वजानिक यातायातका सवारी साधनले सर्वसाधारणलाई बीच बाटोमै अलपत्र पार्न थालेपछि ललितपुरको लगनखेल–गोदावारी रुटमा चल्ने सार्वजनिक सवारी साधनलाई बुधबारदेखि जोर बिजोर प्रणाली लागु गरिएको छ ।
यातायात व्यवसायी र मजदुर संघको सहकार्यमा लगनखेलबाट जाने—आउने सवारी साधनलाई जोर विजोर प्रणाली लागु गरिएको ललितपुर ट्राफिक प्रमुख प्रहरी निरिक्षक सिताराम हाछेथुले जानकारी दिए ।
साँझ र रातको समयमा गोदावारीसम्म यात्रु नलैजाने, लगनखेलबाटै यात्रु भरिएपछि मात्र जाने र यात्रु भरिएपछि बीचमा यात्रु नचढाउने लगायत कार्य हुन थालेपछि ट्राफिक प्रहरीले बुधबारदेखि जोर बिजोर प्रणाली सुरु गरेको होे ।
बुधबारदेखि एकहप्तासम्मको लागि लगनखेलदेखि टौखेलसम्म जाने र आउने सवारी साधनलाई जोर नम्बर र लगनखेल देखि गोदावरीसम्मको रुटमा बिजोर नम्बरको सवारी साधनलाई चल्ने व्यवस्था गरिएको छ ।
प्रत्येक सातापछि उक्त नियम परिर्वतन हुने ट्राफिक प्रहरी निरीक्षक सिताराम हाछेथुले बताए ।