विराटनगर ।अख्तियार दुरपयोग अनुसन्धान आयोगले प्रवद्र्धनात्मक, निरोधात्मक र दण्डनात्मक रणनीति अपनाएर काम गर्ने गरेको छ ।
आयोग इटहरीद्वारा आज यहाँ आयोजित ‘भ्रष्टाचार नियन्त्रणमा आयोगको भूमिका’ विषयको एकदिने जिल्लास्तरीय गोष्ठीमा सुशासन तथा भ्रष्टाचाररहित समाज कायम गर्नु नै आयोगको मूल उद्देश्य रहेको र आयोगले ती नीतिअन्तर्गत सचेतना, सुझाव र अनुसन्धानपछि दण्डानात्मक रणनीति अपनाएको जानकारी दिइएको छ ।
विभिन्न कार्यालयका प्रमुख, नवनिर्वाचित जनप्रतिनिधि र नागरिक समाजको सहभागिता रहेको सो कार्यक्रममा आयोगद्वारा भ्रष्टाचार नियन्त्रणसम्बन्धी कानुन र नियन्त्रणमा आयोगको भूमिका, उजुरीको माध्यम, भ्रष्टाचारका कारण, भ्रष्टाचारबाट हुने हानि र अनुभूत गरिएका समस्याका विषयमा प्रकाश पारिएको थियो ।
सो अवसरमा आयोगका आयुक्त डा सावित्री थापा गुरुङले भ्रष्टाचार विकासको मुख्य बाधक रहेकाले सुशासन र भ्रष्टाचार नियन्त्रण गर्न आयोग प्रतिबद्ध रहेको बताए । आयोग इटहरीका प्रमुख कालीप्रसाद पराजुलीले भ्रष्टाचारमुक्त समाज निर्माणमा राजनीतिक दल, कर्मचारी, पत्रकारका साथै नागरिक समाजको सहयोग आवश्यक रहेको बताए ।
प्रदेश नं १ का प्रहरी अतिरिक्त महानिरीक्षक पशुपति उपाध्यायले आयोगको कामकारबाहीमा प्रहरीले महत्वपूर्ण भूमिका खेलेको प्रसङ्ग उल्लेख गर्दै यतिखेर प्रहरीमा व्यापक रुपमा आन्तरिक शुद्धीकरणमा जोड दिएको जानकारी दिए । आयोगका शाखा अधिकृत नीलकण्ठ विश्वकर्माले कार्यपत्र प्रस्तुत गर्दै गत आवमा ६५२ मुद्दा दर्ता भएकामा ६२७ वटा मुद्दा फछर्योट भएको जानकारी दिए । रासस