काठमाडौं । विभिन्न आशंका बीच आइतबार ४९ दलले उमेदवारको सूची बुझाएपछि अब प्रदेशसभा र प्रतिनिधिसभा निर्वाचन हुने पक्का भएको छ । 

समानुपातिकको सूचीमा कुन–कुन नेता परे भन्ने अझै भन्न सकिने अवस्था छैन । उता प्रत्यक्ष उमेदवार टुंग्याउन एमाले–माओवादीको बाम गठबन्धन निरन्तर सक्रिय छ भने कांग्रेसले सोमबार (आज) सम्म पार्टी एकता मै व्यस्त छ । 

निर्वाचन आयोगमा दर्ता भएका ८८ दलमध्ये ४९ मात्रै समानुपातिक उमेदवारको सूची पेश गरे भने कतिपय यसैबीचमा एकीकरण र विलय हुन पुगे । सोमबार मात्रै विजय गच्छेदार नेतृत्वको नेपाल लोकतान्त्रिक फोरम कांग्रेसमा मिसिन पुगेको छ ।

देशभरको माहोल जस्तै पर्वत जिल्लामा पनि चुनावले तातेको छ । अहिले चुनावी प्रचार–प्रसारभन्दा बाम गठबन्धन र कांग्रेसमा कसले टिकट पाउला भन्नेले पर्वतबासी जिज्ञासु बनेर बसेका छन् । 

दोस्रो चरण अन्तर्गत मंसिर २१ गते निर्वाचन हुने पर्वतमा कांग्रेस र बाम–गठबन्धनले जिल्लाबाट उमेदवार सिफारिस गरेपनि केन्द्रबाट टुंगिएको छैन । 

पर्वतमा गठबन्धन गरेका दलमा एमालेको मत माओवादीको भन्दा निकै बढि भएकाले तालमेलमा पनि कठिनाई भएको स्रोतले जनाएको छ ।  

गठबन्धनमा १ मात्रै क्षेत्र रहेको प्रतिनिधिसभा र प्रदेशको एउटा क्षेत्र एमाले तथा दोस्रो क्षेत्र माओवादीले लिने मोटामोटी समझदारी भएको छ । तर, कुन क्षेत्र माओवादीलाई दिने भन्ने अहिलेसम्म टुंगिन सकेको छैन । दुई मध्ये जुन क्षेत्र लिँदा पनि माओवादी एमालेकै भोटमा भर पर्नुपर्दा हु्ँदा टुंग्याउन गाह्रो भएको हो ।

एमालेको प्रतिनिधिसभाका लागि ७ जनाको नाम सिफासिर भएपनि पोलिटब्यूरो सदस्य गणेश तिमिल्सिना र निवर्तमान क्षेत्र नं २ सांसद विकास लम्साल मध्ये एक हुनेछन् ।   

उता कांग्रेसले पनि प्रतिनिधिसभा पूर्व सांसद अर्जुनप्रसाद जोशी, ऋषिकेश तिवारी, ललितकला गुरुङ र बसन्त सिकेको नाम सिफारिस गरेको छ । यी मध्ये अहिलेसम्म नाम टुंगिसकेको छैन ।

प्रतिनिधिसभा : बाम गठबन्धन ८ हजार ७०३ मतले कांग्रेसभन्दा अगाडि
२४० निर्वाचन क्षेत्र हुँदा केन्द्रीय संसदका लागि दुई क्षेत्र भएको पर्वत अहिले एउटा मात्रै क्षेत्रमा सिमित भएको छ । 

दुई क्षेत्र हुँदा क्षेत्र नं १ बाट २०५६ को संसदीय निर्वाचन, पहिलो संविधानसभा र दोस्रो संविधानसभा निर्वाचनमा कांग्रेसका अर्जुनप्रसाद जोशी लगातार विजयी भएका थिए । क्षेत्र नं २ बाट २०५६ मा कांग्रेस, पहिलो संविधानसभा निर्वाचनमा माओवादी केन्द्र तथा २०७० को चुनावमा एमाले विजयी भएको थियो । 

अब, दुई क्षेत्र एउटै हुँदा र बाम गठबन्धनसँग प्रतिस्पर्धा गर्न कांग्रेसलाई सहज देखिँदैन । १ लाख ७ हजार २९८ मतदाता रहेको पर्वतमा दुई नगरपालिकासहित ७ स्थानीय तह छन् । जसमध्ये ४ तह एमालेले जितेको छ भने ३ मा कांग्रेस विजयी भएको छ । जिल्लाका ६२ वडा मध्ये ३७ मा एमाले, २१ मा कांग्रेस र ४ वडामा माओवादी विजयी भएको छ ।
यहाँ हामीले वडा अध्यक्षले प्राप्त गरेको मतलाई पार्टीले प्राप्त गरेको मतका रुपमा विश्लेषण गरेका छौं । विश्लेषणअनुसार जिल्लामा एमाले ३० हजार ३५ मत प्राप्त गरेको छ भने कांग्रेसको २७ हजार ७९५ मत छ । यता माओवादी केन्द्रको ६ हजार ६६५ मत छ भने राप्रपाले २०१ मत मात्रै ल्याएको छ । 

जसले गर्दा एमाले–माओवादी गठबन्धनको पक्षमा ३६ हजार ७०० मत हुँदा कांग्रेसको पक्षमा २७ हजार ९९७ रहेको छ । स्थानीय तहको नतिजाअनुसार  दुई पक्षबीचको अन्तर ८ हजार ७०३ मतको रहेको छ । 

भोट अन्तर ठूलो भएपनि पर्वतका मतदातले उमेदवार पनि हेर्दै आएका छन् । कांग्रेसभन्दा एमाले बढी भएको भनीने क्षेत्र नं १ मा तीन पटकसम्म अर्जुनप्रसाद जोशी विजयी भएका थिए । कांग्रेसका लागि जोशी नै बलियो र बाम गठबन्धनसँग कडा प्रतिस्पर्धा गर्नसक्ने नेता हुन् । 

उता क्षेत्र नं २ मा एमालेभन्दा कांग्रेस केही बलियो रहेको बताइए पनि २०७० मा एमाले विजयी भएको थियो । तर, माओवादी सँगको गठबन्धनले गर्दा एमाले उमेदवारलाई सहज भने पक्कै हुनेछ ।

प्रदेश क्षेत्र १ (क) : मतमा गठबन्धन अगाडि 
प्रदेशको दुबै क्षेत्रमा कांग्रेस र एमालेबीच मात्रै कडा टक्कर हुने थियो । तर, माओवादीसँग तालमेल गरेको अवस्थामा बाम गठबन्धनको मत बढी छ ।  प्रदेशको क्षेत्र १ मा एमालेको १७ हजार ३८१ मत रहेको छ भने माओवादीको ४ हजार ६८ मत रहेको छ । कांग्रेसको पक्षमा १५ हजार १०७ मत रहेको छ । 

यो क्षेत्रमा एमालेबाट जिल्ला अध्यक्ष पदम गिरीको सम्भावना बढी छ । यद्यपी गठबन्धन गरेको माओवादीलाई यो क्षेत्र पर्न पनि सक्छ । त्यो हुँदा आफ्नो पक्षमा धेरै मत हुँदा हुँदै पनि एमाले कार्यकर्ताले माओवादीलाई भोट हाल्नुपर्ने हुन्छ । 

यता कांग्रेस पनि बाम गठबन्धनको असन्तुष्टिलाई प्रयोग गर्दै नतिजा आफ्नो पक्षमा पार्ने दाउमा देखिन्छ ।

प्रदेश क्षेत्र १ (ख) : उमेदवारले जित टुंगो
 प्रदेश क्षेत्र १(ख) मा एमालेको पक्षमा १३ हजार ६५४ मत छ भने माओवादीले जम्मा २ हजार ५९७ मत मात्रै छ । यता कांग्रेसको १२ हजार ६८९ मत रहेको छ । यो क्षेत्र पनि गठबन्धनको कुन दलले लिने भन्ने अझै टुंग्गो भइसकेको छैन । यद्यपि गठबन्धनको पक्षमा १६ हजार २५१ छ । 

माओवादी भन्दा धेरै मत अन्तरले अगाडि भएका कारण यस क्षेत्रका एमाले कार्यकर्ता पनि माओवादीलाई दिने पक्षमा छैनन् । तर, सबै जिल्लामा दुई पार्टीकै उपस्थिति देखाउने रणनीतिका कारण एमाले पक्षले एउटा क्षेत्र मान्नै पर्ने हुन्छ ।