काठमाडौं । विश्व फुटबल महासंघ (फिफा) ले सोमबार सार्वजनिक गरेको फिफा बरियतामा नेपाल १ स्थान तल झरेको छ । फिफा बरियतामा १७५ औं स्थानबाट एक स्थान तल झर्दै १७६ औं स्थानमा पुगेको हो ।

नेपालले असोज २४ गते एएफसी एसियन कप छनोट अन्तर्गत ताजिकिस्तानसँग भएको खेलमा ३–० गोलअन्तरले पराजित भएको थियो । दक्षिण एसियामा भने नेपाल चौथो स्थानमा छ । भारत फिफा बरियताको १०५ औं स्थानमा रहेको छ । त्यस्तै, अफगानिस्तान १५४ औं स्थानमा छ भने माल्दिभ्स १५६ औं स्थानमा रहेको छ । 

यो पटक भने १६ स्थान तल झर्दै भुटान भने १९० औं स्थानमा पुगेको छ । १९६ औं स्थानमा बंगलादेश रहँदा १९८ औं स्थानमा श्रीलंका रहन सफल भएको छ । केही दिनअघि मात्रै फिफाको निलम्बनमा परेको पाकिस्तान भने २०१ औं स्थानमा छ ।

फिफा बरियताको शीर्ष स्थानमा विश्व विजेता जर्मनी रहेको छ । त्यस्तै, दोस्रो ब्राजिल, तेस्रोमा पोर्चुगल र चौथो स्थानमा अर्जेन्टिना रहेको छ । पाचौं स्थानमा बेल्जियम रहदा छैटौं स्थानमा पोल्याण्ड रहेको छ । फ्रान्स भने एक स्थान माथि उक्लिँदै सातौं स्थानमा पुगेको छ ।

यता, तीन स्थान माथि चडेको स्पेन आठौं स्थानमा छ । त्यस्तै, नवौं स्थानमा चिली रहँदा १० औं स्थानमा पेरु पर्न सफल भएको छ ।