व्यवसायी महासंघका अध्यक्ष शरदकुमार गौचनको हत्या काण्डको चौथो दिनमा घटनाको अनुसन्धान गर्न गठित प्रहरी टोलीले घटनामा प्रयोग भएको मोटरसाइकल पहिचान गरी गोली प्रहार गर्ने सुटरको स्केच तयार पारेको छ । घटनाबारे अनुसन्धान गर्न बनेको समितिका संयोजक डिआइजी गणेश केसीले घटनामा संलग्न केही व्यक्तिको पहिचान गर्ने काम भइरहेको र घटनामा प्रयोग भएको मोटरसाइलको पहिचानको नजिक पुगेको जनाएका छन् ।
“अनुसन्धान सकारात्मक रुपमा अगाडि बढेको छ । अनुसन्धान गर्दैछौं, परिणाम राम्रै निस्कन्छ,” उनले भने । सोमबार दिउँसो गौचनलाई गोली हान्न दुई युवकले रातो रंगको पल्सर मोटरसाइकल प्रयोग गरेको अनुसन्धानबाट देखिएको एक प्रहरी अधिकृतले जानकारी दिए ।
घटनास्थल भन्दा करिब २ सय मिटर नै पर मोटरसाइकल रोकी गोली हानी उनीहरु पैदलै मोटरसाइकल भएको स्थानसम्म पुगी मोटरसाइकल चढी भागेका थिए । प्रहरीले नम्बर प्लेटको आधारमा मोटरसाइकल धनीको खोजी थालेको छ । “मोटरसाइकल पत्ता लागे पनि सही धनी को हो भन्ने बारेमा खोज्दैछौं,” डीआईजी केसीले भने, “बाइक चोरीको र नम्बर प्लेट पनि नक्कली राखेको हुन सक्छ ।”
गत पुस ४ गते मनोज पुन समूहले रुपन्देही युवा संघ अध्यक्ष दुर्गा तिवारीको हत्यामा प्रयोग गरेको बा ५१ प ८०७३ नम्वरको रातो १५० सिसीको पल्सर बाइक चोरीको र नक्कली नम्बर प्लेट भएको फेला पारेको थियो ।