..jpeg)
काठमाडौं । कम्युनिष्ट गठबन्धन बनेको केहीदिनमै बाबुराम भट्टरार्इ नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्षसँग असन्तुष्ट बनेका छन् ।
आगामी प्रदेश र प्रतिनिधिसभाको निर्वाचनको लागि क्षेत्र बाँडफाट विषयमा कुरा नमिलेपछि भट्टरार्इले गठबन्धनप्रति असन्तुष्ट जनाएका हुन् ।
यसअघि चुनाव लड्दै आएका भट्टराईकै गृहजिल्लामा माओवादी केन्द्रले नारायणकाजी श्रेष्ठलाई अघि सारेपछि भट्टराईले गठबन्धनप्रति असन्तुष्टी जनाएका हुन् ।
भट्टराईले गृहजिल्ला गोरखा क्षेत्र नम्बर २ बाट गठबन्धनमा जोडिनु अघिनै चुनाव लड्ने बताए पनि गोरखा क्षेत्र नम्बर २ नछोड्ने बरु काठमाडौंबाट चुनाव लड्न माओवादी केन्द्रले भट्टराईलाई प्रस्ताव गरेपछि गठबन्धनप्रति नै खटपट बढेको नयाँ शक्तिका एक नेताले बताए ।
माओवादीले गोरखा क्षेत्र नम्बर २ नछोड्ने अडान लिएपछि संयोजक भट्टराई बुधबार बालकोटस्थित ओली निवास पुगेका थिए । भेटमा ओलीले, ''माओवादीका केही नेताले भट्टराईलाई गठबन्धनमा ल्याउनै नचाहेको र गठबन्धनमा बाँधिएपछि पनि विभिन्न जालझेलमा हराउन चाहेको'' बताएपछि उनी थप झस्किएका थिए ।
माओवादीले क्षेत्र नम्बर २ नछोड्ने अडान अघि सारेपछि भट्टराईले पनि कुनै हालतमा उक्त क्षेत्र नछोड्ने नयाँ शक्तिकी नेतृ हिसीला यमिले बाह्रखरीसँग बताइन् ।
गठबन्धन तोडौं : कार्यकर्ता
चुनाव चिन्ह र निर्वाचन क्षेत्र बाँडफाटको विषयमा तिक्तता बढेपछि नयाँ शक्तिका नेता तथा कार्यकर्ताले संयोजक भट्टराईलाई वाम गठबन्धनमा सम्मानजनक सहमति नहुने हो भने आफ्नै चुनाव चिन्ह आँखा लिएर लड्न र कुनै पनि हालतमा गोरखा क्षेत्र नम्बर २ नछोड्न आग्रह गरेका छन् । कार्यकर्ताहरुले बाबुरामलाई गठबन्धन तोडेर काँग्रेसलगायतका मधेसी दहहरुसँग चुनावी तालमेल गर्न सुझाव पनि दिएका छन् ।
एमालेको चुनाव चिन्ह लिएर चुनाव लड्ने भएपछि धादिङलगायत देशका विभिन्न ठाउँहरुमा उमेदवारी सिफारिस भएका उमेदवारहरु पनि अहिले अलमलमा छन् ।
गठबन्धनमा बाँधिएपछि नयाँ शक्तिले एमालेको चुनाव चिन्ह प्रयोग गर्ने बताएको थियो । नयाँ शक्तिले हालै सम्पन स्थानीय तहको पहिलो चरणमा संघीय समाजवादी फोरमको मशाल र तेस्रो चरणको निर्वाचनमा नेपाल कम्युनिष्ट पार्टी संयुक्तको हसिँया चिन्हमा चुनाव लडेको थियो ।
फाइल तस्बिर
