काठमाडौं । प्रतिनिधिसभा र प्रदेशसभा निर्वाचन नजिकिँदै गर्दा राजनीतिक दलहरूबीच ध्रुविकरण पनि बढेको छ ।
विशेषगरी एमाले, माओवादी र नयाँ शक्तिबीच गठबन्धनको घोषणा भएपछि चुनावी परिणाम पनि रोचक बन्ने देखिएको छ । सँगै कांग्रेस पनि लोकतान्त्रिक गठबन्धन बनाउन लागि परेको छ भने साना दलहरु मुख्य दलसँग विलय तथा ठूला दलको चुनाव चिन्ह लिएर मैदानमा उत्रिने भएका छन् ।
पछिल्लो राजनीतिक विकासक्रमले देशभर चुनावी तरंग ल्याएको छ । सँगै देशको राजधानीसमेत रहेको काठमाडौं चुनावी परिणाम कस्तो आउला भन्ने सबैको चासो रहेको छ । काठमाडौं चुनाव सँधै फरक र रोचक हुने गर्छ । यद्यपी चुनावी आँकलन र विश्लेषण गर्दा यसअघिका परिणामलाई मुख्य आधार बनाउनुपर्ने हुन्छ ।
हामीले पनि हालै सम्पन्न स्थानीय तह निर्वाचनमा वडा अध्यक्षले प्राप्त गरेको मतलाई मुख्य तथा २०७० मा सम्पन्न दोस्रो संविधानसभा निर्वाचन तथा २०६४ को नतिजा र भोटिङ ट्रेन्डलाई आधार मान्दै आगामी निर्वाचनको नतिजा के होला त ?
काठमाडौं जिल्लाको कुरा गर्दा एक महानगरसहित १० स्थानीय तह कायम छन् भने प्रतिनिधिसभाका लागि १० र प्रदेशसभाका लागि २० निर्वाचन क्षेत्र कायम छन् । काठमाडौंमा मतदाताले एउटै पार्टी र व्यक्तिलाई विश्वास गरेको पाइँदैन ।
यहाँका मतदाता भोटिङ टे«न्ड माहोलका आधारमा परिवर्तन हुने गर्छ । २०६४ को निर्वाचनमा ६ क्षेत्रमा कांग्रेस विजयी भएको थियो भने ४ स्थानमा तत्कालिन नेकपा माओवादीले जित हासिल गरेको थियो । ०६४ मा एमालेले कुनै पनि क्षेत्र जित्न सकेन ।
०७० मा भएको दोस्रो संविधानसभा निर्वाचनमा कांग्रेसले ७ निर्वाचन क्षेत्र जितेको थियो भने एमालेले ३ क्षेत्र जितेको थियो । जसमा माओवादीले एउटा क्षेत्रमा पनि जित हासिल गर्न सकेन । समानुपातीक भोटमा प्रत्येक्षमा कुनै सिट जित्न नसकेको राप्रपा दोस्रो भएको थियो ।
तर हालै करिब २० वर्षपछि भएको स्थानीय तह निर्वाचनमा काठमाडौंका ११ मध्ये ५० प्रतिशत जनसंख्या र मतदाता रहेको काठमाडौं महानगरपालिकासहित ७ तह एमालेले जित्दा कांग्रेस ४ नगरपालिकामा खुम्चियो । अन्य पार्टीले एक तह पनि जित्न सकेनन् ।
यसरी पछिल्लो १० वर्षमा भएका निर्वाचनलाई आधार मान्ने हो भने पनि काठमाडौंका मतदाता स्थिर देखिँदैनन् ।
स्थानीय निर्वाचनमा ५ लाख ५९ हजार ४०५ काठमाडौंमा प्रदेशसभा र प्रतिनिधिसभाका ६ लाख ३ हजार ६२० मतदाता रहेको निर्वाचन आयोगले जनाएको छ ।
अर्थात स्थानीय चुनावमा भन्दा अहिले ४४ हजार २१५ मतदाता थप भएका छन् । थपिएको मतको भोट पनि सबै पार्टीलाई बाँडिने भएकाले यो विश्लेषणको मुख्य आधार स्थानीय तहको निर्वाचन र संविधानसभाका दुई निर्वाचन नै हुन् ।
यसमा पनि वडा अध्यक्षले प्राप्त गरेको मतलाई सो पार्टीले प्राप्त गरेको मतका रुपमा हामीले विश्लेषण गरेका छौं । यो विश्लेषणमा क्षेत्र नं १ बाहेक ९ क्षेत्रमा बाम गठबन्धन लोकतान्त्रिक गठबन्धनभन्दा अगाडि देखिएको छ ।
काठमाडौं क्षेत्र नं १ कांग्रेस बलियो
काठमाडौं क्षेत्र नं १ मा काठमाडौं महानगरपालिकाका वडा नं १०, ११, २९ र ३१ पर्दछन् । यी वडा भनेको साविकको १०, ११, ३२ र ३४ नम्बर वडा हुन् । क्षेत्र नं १ मा २०६४ र ०७० को चुनावमा यो क्षेत्रबाट नेपाली कांग्रेसका नेता प्रकाशमान सिंह भारी मत अन्तरले विजयी भएका थिए । उनलाई अहिले गठबन्धन बनाएका एमाले–माओवादी मिल्दा समेत त्यो अन्तर पुरा गर्न सक्दैनन् ।
तर, १० वर्ष र ४ वर्ष अघिको निर्वाचन नतिजाभन्दा हालै सम्पन्न स्थानीय तहको नतिजालाई दुई महिनापछि हुने निर्वाचनको विश्लेषणको नजिकको आधार बनाउन सकिन्छ ।
वैशाख ३१ गते सम्पन्न स्थानीय निर्वाचनमा यो क्षेत्र अन्तर्गत पर्ने ४ वडा मध्ये १०, ११ र २९ कांग्रेस र यो निर्वाचन क्षेत्रको प्रदेश निर्वाचन क्षेत्र १(ख) अर्थात वडा नं ३२ मा एमालेले जितेको छ । स्थानीय चुनावमा सो वडामा मात्रै १६ हजार ८३३ मतदाता थिए ।
यी वडाका अध्यक्षले प्राप्त गरेका मतअनुसार कांग्रेसले सबैभन्दा बढी ८ हजार ८४२, एमालेले ८ हजार ७१७, माओवादीले २ हजार २७४ र राप्रपाले १ हजार ५४० मत प्राप्त गरेका छन् । वडा अध्यक्षको नतिजामा एमाले–माओवादीको मत बढी देखिन्छ । तर, कांग्रेसले राप्रपासँग तालमेल गरेमा ती दलका उमेदवारलाई सहजै पराजित गर्न सक्छ ।
यो क्षेत्रमा कांग्रेस उमेदवार सिंह प्रभावशाली भएका कारण पनि वाम गठबन्धनलाई यो क्षेत्र आफ्नो पक्षमा पार्न गाह्रो छ ।
क्षेत्र नं २ मा एमाले बलियो, राप्रपासँग मिल्दा कांग्रेस टक्करमा
क्षेत्र नम्बर २ काठमाडौं महानगरको वडा नं ९ र ३२, कागेश्वरी मनोहरा नगरपालिकाको वडा नं ४, ५, ६, ७, ८,९ तथा शंखरापुरा नगरपालिका समेटिएर बनेको छ ।
यो क्षेत्रबाट २०६४ को चुनावमा माओवादी उमेदवार झक्कुप्रसाद सुवेदी तत्कालिन एमालेका महासचिव माधवकुमार नेपाललाई पराजित गरेर चर्चा कमाएका थिए ।
०७० को चुनावमा माधव नेपाल नै विजयी भए । तर, रौतहटबाट पनि चुनाव लडेका उनले सो क्षेत्र छोडेपछि भएको उपनिर्वाचनमा कांग्रेस उमेदवार दिपक कुईँकेल विजयी भएका थिए ।
हालै सम्पन्न स्थानीय चुनावमा यो क्षेत्र अन्तर्गतका महानगरका ९, ३२, कागेश्वरी नगरपालिका ५, ६, ८, ९ र शंखरापुर नगरपालिकाका ९ मध्ये १, २, ५, ८ र ९ मा एमाले, ६ र ७ मा राप्रपा, ३ मा माओवादी र ४ मा मात्रै कांग्रेस विजयी भएको छ ।
क्षेत्र नं २ अन्तर्गत पर्नेे वडा तहको नतिजाका आधारमा एमाले १९ हजार १९६ मतका साथ पहिलो, कांग्रेस १५ हजार ६२७, माओवादीले ५ हजार ७३४ र राप्रपाले ४ हजार ८५१ मत प्राप्त गरेको छ । यो तथ्यांकले एमाले–माओवादी गठबन्धनको जित सहज देखिन्छ । यद्यपी राम्रो उमेदवार उठाएर राप्रपासँग तालमेल गर्दा कांग्रेस पनि कमजोर देखिँदैन ।
यसको प्रमाणका रुपमा ०७० को चुनावमा २१ हजार ७४८ मत ल्याएर माधव नेपाल विजयी हुँदा कांग्रेसका प्रतिमा गौतमले १२ हजार ४७५ मत मात्रै प्राप्त गरेका थिए ।
तर, उपनिर्वाचनमा कांग्रेसका दिपक कुईँकेलले एमालेका कृष्णगोपाल श्रेष्ठलाई पराजित गरेका थिए ।
क्षेत्र नं ३ः एमाले–माओवादी गठबन्धनलाई कांग्रेस–राप्रपाको मेल चुनौती
काठमाडौं क्षेत्र नं ३ अन्तर्गत महानगरको वडा नं ६, गोकर्णेश्वर नगरपालिका तथा कागेश्वरी–मनहरा नगरपालिकाका वडा नं १, २ र ३ पर्दछन् । क्षेत्र नं ३ बाट ०७० को चुनावमा एमाले उमेदवार रामेश्वर फुयाँल १३ हजार १०४ मत ल्याउँदै विजयी हुँदा कांग्रेसका चक्रबहादुर ठकुरी १२ हजार २४६ मत ल्याउँदा पराजित भएका थिए ।
यता २०६४ को चुनावमा उनै चक्रबहादुर ठकुरीले १२ हजार ९६६ मत ल्याएर ९ हजार ५४९ ल्याएका रामेश्वर फुँयाललाई पराजित गरेका थिए । माओवादी यो क्षेत्रमा दुबै निर्वाचनमा तेस्रो स्थानमा रहेको थियो ।
स्थानीय निर्वाचनको कुरा गर्दा महानगरको वडा नं ६, गोकर्णेश्वर नगरपालिका र त्यसका वडा १, ३, ५, ६, ८ र ९ तथा कागेश्वरी मनहराको वडा नं २ कांग्रेसले जित हासिल गरेको छ । गोकर्णेश्वरको ४ र ६ मा एमाले तथा २ मा राप्रापा विजयीले वडा जितेको थियो भने कागेश्वरीको १ र ३ मा एमाले विजयी भएको थियो ।
यो क्षेत्र अन्तर्गतका वडाको तथ्यांकलाई केलाउँदा १४ हजार ३८४ मतसहित कांग्रेस पहिलो १२ हजार ७०७ मतसहित एमाले, ४ हजार ४५१ माओवादीको मत तथा १ हजार ४४१ राप्रपाको मत रहेको छ ।
एकल मतका आधारमा यो क्षेत्रमा कांग्रेस बलियो देखिएको छ । तर, एमाले र माओवादीको गठबन्धन बन्दा कांग्रेसले राप्रपासँग तालमेल गरेमा कडा प्रतिस्पर्धा हुने अनुमान गर्न सकिन्छ ।
क्षेत्र नं ४ः गगन थापा उठ्दा वाम गठबन्धनलाई गाह्रो
काठमाडौं क्षेत्र नं ४ अन्तर्गत महानगरका वडा नं १, ७, ८ र ३० र बुढानिलकण्ठ नगरपालिकाका वडा नं १, २, ८, ९, १०, ११, १२ र १३ नम्बर वडा पर्दछन् ।
यो क्षेत्रमा ०७० को चुनावमा कांग्रेसका युवा नेता गगनकुमार थापा भारी मतअन्तरले विजयी भएका थिए । थापाले २२ हजार ३३६ मत ल्याउँदा एमालेका निर्मल कुइकेल ९ हजार १३५ र माओवादीका नन्दबहादुर पुन ( वर्तमान उपराष्ट्रपति) ले ६ हजार ४६२ मत ल्याएका थिए ।
२०६४ को चुनावमा पनि कांग्रेसकी सुप्रभा घिमिरेले १३ हजार ४५१ मत ल्याउँदै ९ हजार ८४२ मत ल्याएकी एमाले उमेदवार (वर्तमान राष्ट्रपति) विद्यादेवी भण्डारीलाई पराजित गरेकी थिइन् । यी दुई चुनावको नतिजा हेर्दा उक्त क्षेत्रमा कांग्रेस बलियो देखिन्छ ।
तर, स्थानीय तह निर्वाचनको नजिता हेर्दा यो क्षेत्रअन्तर्गत पर्ने वडाको नतिजाअनुसार कांग्रेसले महानगरको वडा नं ८ र ३० बाहेक जित्न सकेन । वडा अध्यक्षको मतका आधारमा यो क्षेत्रमा एमालेले १७ हजार २३९ मत ल्याउँदा कांग्रेसको १३ हजार ३१९ मत मात्रै छ । यता एमालेसँग गठबन्धन गरेको माओवादीको पनि ३ हजार ९०९ मत त्यहाँ छ भने कांग्रेससँग तालमेलको तयारी गरेको राप्रपाको २ हजार २७ मत छ ।
स्थानीय तहको नतिजाले यो क्षेत्रमा बाम गठबन्धनलाई जितका लागि सहज हुने देखिन्छ । यद्यपी कांग्रेस युवा नेता थापाको व्यक्तिगत भोटले पनि यो क्षेत्र उनले आफ्नो पक्षमा पार्न सक्छन् ।
यता सम्भावना भएका युवा नेता भएका कारण स्वतन्त्र मतदाताको समर्थन उनलाई हुनसक्छ । तर, आफूलाई एकमात्र बैकल्पिक शक्ति बनाउने विवेकशील साझा पार्टीले सो क्षेत्रबाट २६ वर्षकी सुबुना बस्नेतलाई अघि सारेका कारण स्वतन्त्र भोट उनले तान्न सक्ने आँकलन छ ।
बाम गठबन्धनले बलियो उमेदवारलाई अगाडि सारेमा थापालाई यो क्षेत्र फलामको चिउरा हुने निश्चित छ ।
क्षेत्र नं ५ः गठबन्धन बनाउँदा एमाले महासचिव पोखरेललाई सहज
काठमाडौं क्षेत्र नं ५ अन्तर्गत महानगरका वडा नं. २, ३, ४, र ५ तथा बुढानिलकण्ठ नगरपालिकाको वडा नं. ३, ४, ५, ६, ७ र टोखा नगरपालिकाको वडा नं २, ३, ४, ५, ६ र ७ पर्दछन् ।
यो क्षेत्रमा ०६४ र ०७० को चुनावमा कांग्रेसका नरहरी आचार्यसँग एमाले महासचिव ईश्वर पोखरेल पराजित भएका हुन् । ०६४ मा ४ हजारभन्दा बढी मतअन्तरले आचार्य विजयी भएका थिए । ०७० को चुनावमा आचार्यले १५ हजार ३६४ मत ल्याउँदा ईश्वर पोखरेलले १४ हजार ७२३ मत प्राप्त गरेका थिए ।
स्थानीय तहको निर्वाचन नतिजालाई केलाउँदा एमाले २ हजार भोटले अगाडि छ । यो क्षेत्रमा एमालेको १७ हजार ४६४, कांग्रेसको १५ हजार ४५६, माओवादीको ३ हजार २८४ र राप्रपा १ हजार ९११ मत छ ।
यो चुनावमा पनि एमालेले महासचिव ईश्वर पोखरेललाई सर्वसम्मत उमेदवार बनाएको छ । तर, कांग्रेसका आचार्य बिरामी भएका कारण अर्को व्यक्ति उठ्दा पोखरेलको व्यक्तिगत प्रभाव र स्वतन्त्र मतदाताको भोट उनले पाउने सम्भावना देखिन्छ ।
माओवादीसँग गठबन्धन गर्दा यो क्षेत्र पोखरेलको जित अझ सहज हुने देखिन्छ भने राप्रपाले कांग्रेसलाई समर्थन गर्दा केही राहत हुन सक्छ ।
यता विवेशसील साझा पार्टीका सहसंयोजक उज्ववल कुमार थापाले पनि उमेदवारी घोषण गरेका छन् ।
क्षेत्र नं ६ः योगेशलाई पराजित गर्दै रक्षामन्त्री बनेका प्रधानलाई यसपटक चुनौती
काठमाडौं क्षेत्र नं ६ अन्तर्गत महानगरको वडा नं २६, २७, २८ पर्दछ भने तारकेश्वर नरपालिकाको वडा नं १, २, ६, ७, ८, ९, १० र ११ तथा टोखा नरपालिकाको वडा नं १, ८, ९, १० र ११ पर्दछन् ।
यो क्षेत्रमा २०६४ को निर्वाचनमा माओवादीका हितमान शाक्य र २०७० को निर्वाचमा कांग्रेसका भिमसेनदास प्रधान विजयी भएका हुन् । ०६४ मा शाक्यले १० हजार ७६८ ल्याई विजयी हुँदा कांग्रेसका प्रधानले १० हजार ५८ मत ल्याएका थिए । त्यस्तै, एमाले युवा नेता योगेशकुमार भट्टराईले ९ हजार ८९ मत ल्याई पराजित भएका थिए ।
त्यस्तै, २०७० को निर्वाचनमा प्रधान १४ हजार १५१ मत ल्याई विजयी हुँदा एमालेका भट्टराईले १२ हजार ८७४ मत ल्याए भने माओवादीका हिमाल शर्माले ५ हजार ९४५ मत मात्र ल्याएका थिए ।
भट्टराई लाई पराजित गरेर सांसद भएका प्रधान अहिले रक्षा मन्त्री छन् । तर, स्थानीय तह नतिजामा हेर्दा यो क्षेत्रमा पनि एमाले नै बलियो देखिएको छ । यो क्षेत्रमा एमालेले १४ हजार ०६१ मत पाउँदा कांग्रेसको मत १२ हजार ७४२ मात्र छ । अझ माओवादी–एमालेको गठबन्धन भएका कारणले उसको मत पति जोडिन आउँछ ।
माओवादीले ४ हजार १६४ मत ल्याउँदा यहाँ राप्रपाले १ हजार ३८३ मत प्राप्त गरेको छ । राप्रपाको मतले कांग्रेसलाई केही राहत हुने भएपनि जितका लागि पर्याप्त हुँदैन ।
क्षेत्र नं ७ः गठबन्धनकै पक्कड
काठमाडौं क्षेत्र नं ७ अन्तर्गत काठमाडौं महानगरका वडा नं १६, १७, १८, २५ पर्दछन् भने नागरर्जुन नगरपालिकाका वडा नं १, २ र ३ तथा तारकेश्वर नगरपालिका वडा नं ३, ४ र ५ रहेका छन् ।
यो क्षेत्रमा २०६४ को चुनावमा माओवादीकी हिसिला यमी निकटतम प्रतिद्वन्द्वीभन्दा ४ हजार मतले विजयी भएकी थिइन् । तर, ०७० को चुनावमा एमाले उमेदवार रामवीर मानन्धर १३ हजार २८९ मत ल्याई विजयी हुँदा कांग्रेस उमेदावर प्रमिला डंगोलले १० हजार ४८६ मत ल्याई निकट प्रतिस्पर्धी रहिन् । ०६४ मा विजयी भएकी यमी दोस्रो चुनावमा ७ हजार १५ भोटमै सिमित भइन् ।
यो क्षेत्रमा पनि मतदाता कतिबद्ध देखिँदैनन् । हालै सम्पन्न स्थानीय चुनावको नतिजामा यो क्षेत्रमा एमालेकै मत बढी छ । यो क्षेत्रमा एमालेले १३ हजार ४७५ मत छ भने कांग्रेसको १२ हजार ६४ छ तथा माओवादीको ३ हजार ४७४ तथा राप्रपाको २ हजार १४८ मत रहेको छ ।
२०७० को चुनावमा एमालेका रामवीर मानन्धर विजयी भए पनि नयाँ शक्ति पार्टीले सूर्य चिन्हबाट लड्ने भएपछि नयाँ शक्तिकी नेतृ हिसिला यमीले मौका पाउन सक्छन् ।
काठमाडौं क्षेत्र नं ८ः राप्रपाको तालमेलले कांग्रेसलाई राहत
काठमाडौं क्षेत्र नं ८ अन्तर्गत काठमाडौं महानगरका वडा नं १३, १५, १९, २०, २३, २४ तथा ना नागार्जुन नगरपालिकाको वडा नं ४ र ५ पर्दछ ।
यो क्षेत्र २०६४ तथा २०७० को चुनावमा पनि कांग्रेस उमेदवार नविन्द्रराज जोशी विजयी भएका थिए । उनले २०६४ मा ११ हजार ५ मत ल्याउँदा एमालेकी अष्टलक्ष्मी शाक्यले ६ हजार ८७८ तथा माओवादीका सर्वोत्तम दास डंगोलले ६ हजार ५७३ मत मात्रै प्राप्त गरेका थिए ।
त्यस्तै २०७० को चुनावमा जोशी पुनः भारी मतअन्तरले विजयी भएका थिए । उनले १३ हजार ७७४ मत ल्याउँदा एमाले उमेदवार जिवनराम श्रेष्ठले ६ हजार ३६७ तथा राप्रपा उमवेदवार प्रकाश रिमालले ४ हजार ९३४ मत ल्याउँदै तेस्रो भएका थिए ।
तर, स्थानीय तह निर्वाचनमा यो क्षेत्रमा पनि एमालेले कांग्रेसलाई करिब ३५ सय भोटले उछिनेको छ । यो क्षेत्रमा एमालेले १३ हजार ५८१ मत ल्याउँदा कांग्रेसले १० हजार ७२ मत ल्याएको छ । यद्यपी यो क्षेत्रमा माओवादीभन्दा राप्रपाको मत केही बढि भएका कारण सो पार्टीसँग तालमेल गर्दा कांग्रेसलाई राहत हुन सक्छ ।
यो क्षेत्रमा राप्रपाले ३ हजार १५६ मत प्राप्त गर्दा माओवादीको २ हजार ८२८ मत मात्रै छ ।
क्षेत्र नं ९ः राप्रपासँगको गर्दा बाम गठबन्धनलाई कांग्रेसको चुनौती
काठमाडौं क्षेत्र नं ९ मा महानगरका वडा नं १२, १४, २१ र २२ पर्दछन् भने चन्द्रागिरीका वडा नं १, १२, १३, १४ र १५ तथा नागर्जुन नगरपालिकाका वडा नं ६, ७, ८, ९ र १० रहेका छन् ।
यो २०६४ र २०७० मा सम्पन्न संविधानसभा निर्वाचनमा कांग्रेसका ध्यान गोविन्द रंजित विजयी भएको क्षेत्र हो । उनले २०६४ मा १२ हजार ५०१ मत ल्याई १२ हजार २९२ मत ल्याएका माओवादी उमेदवार माईला लामालाई पराजित गरेका थिए । त्यस्तै, एमाले उमेवदार कृष्ण गोपाल श्रेष्ठले पनि १२ हजार १९४ मत ल्याई तेस्रो भएका थिए ।
२०७० को चुनावमा पनि रंजितले १४ हजार ४८३ मत ल्याई विजयी हुँदा एमाले उमेदवार कृष्ण गोपाल श्रेष्ठले १३ हजार १०० मतमा चित्त बुझाए । माओवादीका प्रभावशाली नेता देवेन्द्र पौडेल ६ हजार ६६९ मत ल्याउँदै तेस्रो स्थानमा खुम्चिए ।
यो क्षेत्रमा स्थानीय तहको नतिजाका आधारमा एमाले नै बलियो देखिएको छ । एमालेको १९ हजार ५४१ मत छ भने कांग्रेसको १६ हजार ४७० मत छ । एमालेसँग तालमेल गरेको कांग्रेसको ३ हजार ४२२ तथा कांग्रेससँग तालमेल गरेको राप्रपाको २ हजार १८ मत रहेको छ ।
एमालेको माओवादी र कांग्रेसको राप्रपासँग तालमेल हुँदा प्रतिस्पर्धा रोचक हुने देखिन्छ ।
क्षेत्र नं १०ः प्रचण्ड हारेको क्षेत्रमा गठबन्धनलाई सहज
काठमाडौंको अन्तिम क्षेत्रमा चन्द्रागिरी नगरपालिकाका वडा नं २, ३, ४, ५, ६, ७, ८, ९, १० र ११ तथा दक्षिणकाली नगरपालिका र कीर्तिपुर नगरपालिका पर्दछन् ।
यो क्षेत्रबाट २०६४ को चुनावमा माओवादी अध्यक्ष पुष्पकमल दाहाल २३ हजार २७७ मत ल्याई कांग्रेस उमेदवार राजेन्द्र केसीलाई ११ हजारभन्दा बढी मतले पराजित गरेका थिए । केसीले १२ हजार १५४ मत प्राप्त गरेका थिए ।
तर, २०७० को चुनावमा उनै राजेन्द्र केसीले प्रचण्डलाई करिब ८ हजार मत अन्तरले पराजित गरेका थिए । केसीले २० हजार ३९२ मत ल्याउँदा प्रचण्डले १२ हजार ८५९ मत ल्याएका थिए । त्यस्तै, एमाले उमेदवार सुरेन्द्र मानन्धरले १३ हजार ६१९ मत ल्याएका थिए ।
हालै सम्पन्न स्थानीय तह निर्वाचनमा पनि यो क्षेत्रमा कांग्रेस र एमालेबीच मत टक्कर देखिन्छ । तर, एमाले र माओवादीको गठबन्धन बन्दा उनीहरु बलिया छन् । स्थानीय चुनावमा यो क्षेत्रबाट कांग्रेसले १६ हजार ४८७ मत ल्याउँदा एमालेले १६ हजार ७३१ मत प्राप्त गर्यो । यता माओवादी केन्द्रले पनि ९ हजार १६८ मत ल्याएको छ । तर, कांग्रेससँग तालमेल गरेको राप्रपाको १ हजार १३६ मत मात्र छ ।
यो क्षेत्रमा पनि बाम तालमेल हुँदा उनीहरु जितको बलियो दाबेदार बनेका छन् ।
समग्रमा काठमाडौंका मतदाताले एकै ठाउँमा भोट नहाल्ने र उमेदवारको क्षमता, प्रभाव र दक्षता हेर्ने गरेको पाइएको छ । यद्यपी बाम गठबन्धन बनाएको एमाले स्थानीय चुनावमा पनि काठमाडौंमा बलियो भएका कारण अधिकांश क्षेत्रमा गठबन्धनकै पल्लाभारी हुने देखिन्छ ।