काठमाडौं । एमाले अध्यक्ष केपी शर्मा ओलीले बूढो रुखलाई जति युरिया हाले पनि काम नलाग्ने भन्दै कांग्रेसको उपदादेयता सकिएको बताएका छन् । शुक्रबार राजधानीमा डीआइजी नवराज सिलवाललाई पार्टी प्रवेश गराउँदै कांग्रेसले मुलुकलाई गति दिन नसक्ने ठोकुवा गरेका हुन् ।
उनले नवगठित वाम गठबन्धन एमालेलाई बहुमत ल्याउन नभइ मुलुकको समृद्धिका लागि एक ठाउँमा उभिएको जिकिर गरे ।
“कांग्रेसलाई ठूलो चिन्ता परेको छ, एमालेलाई बहुमत ल्याउन वाम गठबन्धन गरिएको होइन, सबैको बुद्धि विवेक मिसाएर मुलुकलाई समुन्नत बनाउन खोजिएको हो,” उनको भनाइ थियो ।
कांग्रेसले अधिनायकवाद उच्चारण गर्ने ?
अध्यक्ष ओलीले वाम गठबन्धन हुनु ‘कम्युनिष्ट अधिनायकवाद लाद्न खोजिएको’ भन्दै कांग्रेसले टिप्पणी गरेको भन्दै कांग्रेसले त्यसो भन्न नसुहाउने जिकिर गरे ।
“डीआईजीको नम्बर तलमाथि गरेको छ । आफूले भनेको नमानेर प्रधानन्याधीश सुशीला कार्कीलाई महाभियोगको प्रस्ताव पेश गरेको छ,” उनले भने, “ कांग्रेसले हामीलाई अधिनायकवादी भन्ने ?”
उनले डीआईजी समेत अन्यायमा परेको भन्दै निमुखा, सर्वसाधारणको के हालत होला भन्दै चिन्तासमेत प्रकट गरे ।
उनले आफू अल्पमतमा परेपछि बाधा अड्काउ फुकाएर राजीनामा दिएको दृष्टान्त पस्किँदै अधिनायकवादको कल्पनासमेत गर्न नसकिने बताएका छन् ।
उनले कांग्रेसले ०१५ सालकोझैँ बहुमतको हरियो घाँस देखेको भन्दै छेडखान समेत गरे ।
उनले एमालेले मात्रै समृद्धिको मार्ग दिनसक्ने दाबी गरे ।
“हामीसँग ३ पूर्व प्रधानमन्त्री छन् । आठ दश जना उपप्रधानमन्त्री छन् । अनुभव र योग्यता हामीसँग छ,” उनको भनाइ थियो ।