काठमाडौं । भुटानमा जारी यु–१८ साफ च्याम्पियनसिपमा नेपालले पहिलो जित निकालेको छ । शुक्रबार भएको दोस्रो खेलमा नेपालले माल्दिभ्सलाई २–० ले पराजित गरेको हो ।

भुटानको राजधानी थिम्पुस्थित चाङलिमिथाङ रंगशालामा भएको खेलमा नेपाललाई जित दिलाउन रोमन लिम्बु र रजिन सुब्बाले गोल गरेका थिए ।  नेपालले दुवै हाफमा एक–एक गोल गरेको थियो । माल्दिभ्सविरुद्ध एकतर्फी खेल खेलेको नेपालले पहिलो हाफको छैटौं मिनेटमा रोमनको गोलबाट सुरुवाती अग्रता बनाएको थियो ।

पहिलो हाफमा १ – ० ले अघि रहेको नेपालले दोस्रो हाफमा थप एक गोल गर्यो ।  खेलको ५७ औं मिनेमा रजिनले गोल गर्दै नेपाललाई २ – ० को अग्रता दिलाए । त्यसपछि खेलको अन्तिम मिनेटमा नेपालले अग्रता तेब्बर बनाउने मौका पाएको थियो । तर, खेलको इन्जुरी समयमा पाएको पेनाल्टीमा नेपालका अविशेक रिजाल गोल गर्नबाट चुके । उनको प्रहार क्रस बारमा लागेर फर्किएको थियो । 

माल्दिभ्समाथिको जितसँगै नेपालले दुई खेलमा ३ अंक जोडेको छ । नेपाल पहिलो खेलमा बुधबार भुटानसँग १–० गोलअन्तरले पराजित भएको थियो । राउण्ड रोबिनमा जारी प्रतियोगिताको तेस्रो खेलमा नेपालले अब सोमबार  बंगलादेशसँग खेल्ने छ ।

त्यस्तै नेपालले अन्तिम खेल भारतसँग बुधबार  प्रतिस्पर्धा गर्नेछ । लिगको शिर्ष स्थानमा रहने टोलीले उपाधि जित्ने छन् । त्यस्तै अंकको उपविजेता र तेस्रो स्थानको निर्णय हुनेछ ।