काठमाडौं । हलिउड फिल्म किङ्सम्यानः द गोल्डेन सर्कल नेपाली फ्यानमाझ प्रदर्शन गरिएको छ । एप्पल इन्टरटेनमेन्टले बुधबार बेलुका क्यूएफएक्स लबिम हलमा फिल्म प्रदर्शन गरेको हो ।
शुक्रबार यो स्पाइ, एक्सन र कमेडी जानराको फिल्म अमेरिका, नेपाल र भारतसहित विश्वव्यापी रिलिज हुँदैछ । शुक्रबारदेखि नेपालभरका मल्टिप्लेक्सहरुमा म्याथ्यु भगन निर्देशित सिनेमा रिलिज हुँदैछ ।
एप्पल इन्टरटेनमेन्ट हलिउड वितरण कम्पनी ट्वेन्टिथ सेन्चुरी फक्स र सोनीको नेपालस्थित आधिकारिक वितरक हो ।
एप्पलले किङ्सम्यानका डाइहार्ड फ्यान छनोट गर्दै उनीहरुमाझ फिल्म प्रदर्शन गरेको थियो । रेडकार्पेटमा फिल्मका पात्रहरुले लगाउने चस्मा, छाता, ह्याट, बटरफ्लाइ टाइमा समेत फ्यान ठाँटिए । गोलाप्रथा मार्फत भाग्यशालीलाई टिसर्ट बाँडिएको थियो ।
‘हाम्रो उद्देश्य अमेरिका रिलिजसँगै नेपाल प्रदर्शन पनि गर्नु हो’ एप्पल प्रमुख जेनिस पहारीले भनिन्, ‘पछिल्लो समय बदलिएको दर्शकीय स्वाद र बजार ट्रेन्डप्रति हामी सचेत छौं । सोहीअनुसार योजना बनाइरहेका छौं ।
एप्पलले यसअघि सुपरहिरो फिल्म लोगन, एनिमेटेड ड्रामा बोब बेबी र स्पाइडरम्यान: होम कमिङ रिलिज गरेको थियो । कलिन फर्थ, जुलियाना मुरे, टारोन एगर्टन, मार्क स्ट्रंग, हेल बेरी लगायतको मुख्य भूमिका छ ।