काठमाडौं । विमान दुर्घटनामा निधन भएका पुर्व कप्तान तथा फिफा रेफ्री रुपकराज  शर्माको स्मृतिमा साईक्लिङ प्रतियोगिता हुने भएको छ  । रुपक मेमोरियल फाउन्डेसनले विमान  दुर्घटनामा निधन भएकाहरुलाई श्रदान्जली दिने उदेश्यले साईक्लिङ प्रतियोगिता आउने शनिबार  प्रतियोगिता आयोजना गर्ने भएको हो  ।

साईक्लिङ प्रतियोगिता २५ किलोमिटरको हुने छ ।  साईक्लिङमा १५० भन्दा बढी राइडरहरुको सहभागिता रहने छ । साईक्लिङ  सातदोबाटोस्थित मेमोरियलको भवनबाट सुरु भएर ललितपुर लेलेस्थित पीआईए स्मृति पार्कमा पुग्ने छन्  । त्यहाँ विमान दुर्घटनामा निधन भएकाहरुलाई सम्झदै क्यानडल लाइट र केहि अन्तरक्रियाको आयोजना गरिने छ । त्यसपछि पुन साइकल राइडरहरु सातदोबाटोमा आउने छन् । साईक्लिङ विभिन्न समयमा विमान दुर्घटनामा पारी ज्यान गुमाएकाहरुका परिवारहरु समेत सहभागी हुने छन् ।

पाकिस्तानी एयरलाइन्स दुर्घटना भएको २५ औं वार्षिकोत्सवको अवसर पारेर फाउन्डेसनले साईक्लिङ प्रतियोगिता आयोजना गरेको हो । ललितपुरस्थित भट्टेडाँडामा सन् १९९२ को सेप्टेम्बरमा भएको पाकिस्तानी एयरलाइन्सको विमान दुर्घटनामा पुर्व कप्तान तथा फिफा रेफ्री शर्माको निधन भएको थियो । दुर्घटनामा शर्मासहित १६७ जना यात्रुहरुको निधन भएको थियो । उक्त दुर्घटनामा विमान दुर्घटनाको सयौ दुर्घटना समेत रहेको थियो । विस २०३० देखि ४२ सम्म नेपाली राष्ट्रिय टिमका कप्तानको जिम्मेवारी सम्हालेका शर्मा २०४३ सालमा प्रथम फिफा रेफ्रि बनेका थिए ।

साईक्लिङको दौरान विमान दुर्घटना र यसको रोकथामबारे अन्तरक्रिया हुने छन् । अन्तरक्रियामा हवाई विज्ञहरुको उपस्थिति रहने समेत फाउन्डेसनका सचिव क्रिश्मा शर्माले जानकारी दिईन् । स्वर्गीय शर्माकी छोरी समेत रहेकी सचिब शर्माले भनिन् , “हवाई असुरक्षा अहिले पनि  बढी रहेको छ, त्यसैलाई कसरी सुरक्षित बनाउने भन्ने उदेश्य र  हवाई सुरक्षाबारे जनचेतना फैलाउन साईक्लिङको आयोजना गरेका हौ ।”