काठमाडौं । निजी क्षेत्रको मोबाइल सेवा प्रदायक कम्पनी एनसेलले ३५ प्रतिशत खुद मुनाफा आर्जन गरेको छ । कम्पनीको प्रमुख लगानीकर्ता मलेसियन आजियाटा गु्रप बर्हादले हालै सार्वजनिक गरेको २०१७ को दोस्रो त्रैमासिक (अप्रिलदेखि जुन) को वित्तीय प्रतिवेदनले यो देखाएको हो ।
कम्पनीका अनुसार दोस्रो त्रैमासिकमा एनसेलको खुद नाफा मलेसियन रिङ्गेट २०.९८ करोड अर्थात ५ अर्ब १४ करोड रुपैयाँ पुगेको छ । त्यसैगरी पहिलो त्रैमासिकको तुलनामा दोस्रो त्रैमासिकमा कम्पनीको आय ३.९ प्रतिशतले वृद्घि भएको छ । फोरजी सेवा सञ्चालनपछि डाटा सेवामा भएको ११.५ प्रतिशतको वृद्घि र कम्पनीले ल्याएका विभिन्न अफरहरुको योगदानको कारण नाफा बढेको कम्पनीले बताएकोे छ ।
त्यस्तै एनसेलको सञ्चालन मुनाफासमेत ३.५ प्रतिशत बढेको छ । नेपालको एनसेल, क्याम्बोडियाको स्मार्ट र श्रीलंकाको डायलगको प्रमुख योगदानमा आजियाटा गु्रपकै संचालन मुनाफा १२.४ प्रतिशतले बढेको आजियाटाको भनाइ छ ।
अन्तर्राष्ट्रिय आगमन कलबाट हुने आयमा गिरावट आएपनि जेठ १८ बाट संचालनमा ल्याइएको फोरजी र कम्पनीका विविध अफरहरुले गर्दा एनसेलको आयमा सकारात्मक प्रभाव परेको आजियाटाले जानकारी दिएको छ ।
हाल एनसेलको फोरजी सेवा देशका विभिन्न १९ सहरहरुमा संचालनमा रहेकोे छ । सस्तो दरमा सेवा प्रदान गर्न कम्पनीले ‘वान प्लान’ नामक अफर र न्यूनतम २ पैसा प्रतिएमबि इन्टरनेट सेवा लिन सकिने नयाँ डाटा प्याकहरु प्रदान गर्दै आएको जनाएको छ ।
एनसेलको डाटा खपत गत वर्ष सोही समयको तुलनामा साढे दुई गुणाले बढेर ६८ लाख जिबी पुगेको छ । कम्पनीले जनाए अनुसार अघिल्लो वर्ष सोही अवधिमा एनसेलको कुल डाटा खपत २७ लाख जिबी मात्र थियो । डाटा खपतमा वृद्घिसँगै कम्पनीको डाटाबाट हुने आयमा समेत १६.९ प्रतिशतले वृद्घि भएको आजियाटाको भनाइ छ ।
यस वर्षको दोस्रो त्रैमासिकमा कम्पनीको कुल आय १४ अर्ब ४७ करोड रुपैयाँ रहेकोमा डाटा आयको योगदान १७.५ प्रतिशत रहेको जनाइएको छ । कम्पनीका अनुसार कुल एक करोड ५६ लाख ग्राहक रहेकोमा ४४.४ प्रतिशत ग्राहकले डाटा सेवा लिएका छन् । एनसेलका झण्डै ५० प्रतिशत ग्राहकले स्मार्टफोन प्रगोग गर्ने गरेको कम्पनीको दावी छ ।
समीक्षा अवधिमा एनसेलका डाटा ग्राहकले प्रतिमहिना ३४१ एमबि डाटा उपभोग भएको कम्पनीले बताएको छ । जो गत वर्ष सोही अवधिमा प्रतिग्राहक प्रतिमहिना डाटा उपयोग १६० एमबि मात्र थियो ।
पहिलो पटक एनसेलले जेठ १८ मा फोरजी सेवा सञ्चालनमा ल्याएको थियो । पूर्वदेखि पश्चिमसम्म देशका विभिन्न १९ सहरमा फोरजी सेवा उपलब्ध गराउँदै आएको कम्पनीको भनाइ छ ।