अङ्कारा, ५ भदौ । टर्कीको एक विवाह समारोहमा बम विस्फोट गराउने व्यक्ति १२ देखि १४ वर्षको बालक रहेको टर्कीका राष्ट्रपति रिसेप तैयप एर्दोगानले जानकारी दिएका छन् ।
सो हत्याकाण्डपछि आइतबार स्तानबुलमा आयोजित पत्रकार सम्मेलनमा उनले सो जानकारी दिएका हुन् । उनले सो पत्रकार सम्मेलनमा भने,– प्रारम्भिक सूचनाअनुसार यो बम विस्फोटमा संलग्न एक बालक रहेको र उसको उमेर १२ देखि १४ वर्षको रहेको पाइएको छ ।
विस्फोटमा संलग्न आत्मघाती हमलाकारी रहेको पनि उनले बताए । सो हमलामा आईएसको हात रहेको पनि उनले बताए । यस आक्रमणमा आईएस समूहको योजना रहेको प्रारम्भिक सू्चनामा पाइएको र यसको खोजी अझै व्यापक मात्रामा भइरहेको पनि उनले बताए ।
उनले सो हमला अत्यन्तै शक्तिशाली भएको भन्दै यसको अनुसन्धान आवश्यक मात्रामा सुरु भएको जानकारी पनि दिए । उनले सो हमलामा परी मारिनेको सङ्ख्या ५१ पुगेको पनि जानकारी दिए । उनले घाइतेको सङ्ख्या ६९ रहेको र १७ जना नराम्ररी घाइते भएका पनि बताए ।